სასექსის ჰერცოგინიამ, მეგან მარკლმა სექს-მუშაკებს შთამაგონებელი მესიჯები ლანჩის საშუალებით გაუგზავნა. პარასკევს, ის ქმართან, პრინც ჰარისთან ერთად საქველმოქმედო ორგანიზაციას დაუგეგმავად ეწვია.

ქალებისთვის განკუთვნილი მესიჯები მარკლმა ბანანებზე დატოვა. "ძლიერი ხარ", "გვიყვარხარ", "განსაკუთრებული ხარ", "მამაცი ხარ", იკითხება მესიჯებზე, რომლებიც ინტერნეტში ორგანიზაციის თანამშრომლებმა გაავრცელეს.

ორგანიზაციას One25 ჰქვია. ის ქალებს არასასურველი სამუშაოსგან თავის დაღწევაში ეხმარება.

როგორც CNN წერს, მეგანმა ქალებისთვის განკუთვნილი კერძების თვალიერებისას, მესიჯების გაგზავნა სპონტანურად გადაწყვიტა.

"იდეა მაქვს", — თქვა მან და თანამშრომლებს ჰკითხა, ჰქონდათ თუ არა მარკერები.

როგორც ერთ-ერთი თანამშრომელი წერს, მეგანის ჟესტის შემდეგ, ოთახში მყოფთა უმრავლესობას თვალები ცრემლებით ჰქონდა სავსე.