ე.წ ღორის გრიპის ვირუსის საფრთხის გამო სასწავლო პროცესი ილიას სახელმწიფო უნივერსტიტეტშიც გადაიდო. ილიაუნის განცხადებით, სწავლა 11 იანვარს შეწყდება და 21 იანვარს განახლდება.

საქართველოს ტექნიკური უნივერსიტეტში ამბობენ, რომ ჯერ მსჯელობენ განათლების სამინისტროს რეკომენდაციაზე სასწავლო პროცესის გადადების შესახებ. ტექნიკურ უნივერსიტეტში სასწავლო პროცესი 15 იანვრიდან უნდა განახლდეს. მათი თქმით, ცვლილების შემთხვევაში სტუდენტებს თავად აცნობებენ.

გადაწყვეტილება არ მიუღიათ თბილისის სახელმწიფო სამედიცინო უნივერსიტეტშიც. როგორც On.ge-ს განუცხადეს ადმინისტრაცია ამ საკითხს ჯერ კიდევ განიხილავს.

თბილისის სახელმწიფო უნივერსიტეტში კი განაცხადეს, რომ ამავე მიზეზით ფინალური გამოცდები 11-ს ნაცვლად 21 იანვარს დაიწყება.

გრიპის ვირუსის გამო სასწავლო პროცესი გადაიდო საჯარო სკოლებსა და თბილისის საბავშვო ბაღებშიც. სკოლებში არდადეგები 18 იანვრამდე გახანგრძლივდა, ბაღებში კი სააღმზრდელო პროცესი 21 იანვრიდან განახლდება.