2018 წელი მიიწურა და ალბათ თითოეული თქვენგანი ფიქრობთ, რითი იყო გამორჩეული გასული წელი თქვენს ცხოვრებაში. არ ვიცი, რამდენი კარგი და რამდენი ცუდი მოვლენით გამოირჩა თქვენი პირადი და საქმიანი ცხოვრება 366 დღის განმავლობაში, მაგრამ საქართველო ნამდვილად მოწოდების სიმაღლეზე იყო.

მართალია, ნატოში არც წელს შევსულვართ, მაგრამ მოსაწყენად ნამდვილად არ გვეცალა. ჯონ ოლივერი რომ ქართველი ყოფილიყო და თავისი გადაცემა ჩვენი პოლიტიკური რეალობის შესახებ წაეყვანა, სამუშაო მასალა თავზე საყრელად ექნებოდა. არა, ტრამპის ხელში, არც მას აკლდა სახალისო და უცნაური ახალი ამბების გარჩევის ბედნიერება, თუმცა ვფიქრობთ, საქართველო აშშ-ს ამ სფეროში მაინც უწევს დიდ კონკურენციას.

გავიხსენოთ წლის 10 ყველაზე ვირუსული ნიუსი, რომელიც ქართული ინტერნეტის განხილვის საგანი გახდა და წარმოვიდგინოთ, როგორ წარადგენდა მათ ჯონ ოლივერი თავის გადაცემაში.

10. სასამართლომ რელიგიური გრძნობების შელახვის მოტივით აიისა 500 ლარით დააჯარიმა

• სასამართლომ რელიგიური გრძნობების შელახვის მოტივით აიისა 500 ლარით დააჯარიმა;

ეს ისტორია ალბათ ყველას გახსოვთ. სამწუხაროა, რომ საქართველოში კრეატივის თავისუფლება ასეთი უხეში ფორმებით შეილახა, თუმცა ჯონ ოლივერის განხილვის თემაც ხშირად სწორედი ასეთი ამბებია - სასაცილოდ სამწუხარო.

ამ ამბავს ჯონ ოლივერი ალბათ ასე დაიწყებდა: საქართველო ქვეყანაა, რომელშიც ქრისტიანობის სახელით ოცამდე ახალგაზრდას განსხვავებული ორიენტაციის გამო რამდენიმე ათასი ადამიანი ჩასაქოლად მისდევს, მათ შორის ტაბურეტკიანი მღვდლებიც, რომელიც პარალელურად დედას იგინებიან, რაც მძიმე ცოდვებს შორის ერთ-ერთი ყველაზე მძიმეა, თუმცა რელიგიური გრძნობების შეურაცხყოფად მაინც ილუსტრირებული პრეზერვატივი ითვლება.

დიახ, ჯონ ოლივერს გრძელი წინადადებების წარმოთქმა ნამდვილად უყვარს.

9. ისრაელში ეტლით ჩასულმა ქართველმა აეროპორტში დაკავების შემდეგ დამოუკიდებლად გაიარა

• ისრაელში ეტლით ჩასულმა ქართველმა აეროპორტში დაკავების შემდეგ დამოუკიდებლად გაიარა;

ეს ინფორმაცია ინტერნეტში ნეტგაზეთმა გაავრცელა. შეუძლებელია, ასეთი ვირუსული ამბავი ჯონ ოლივერისნაირ ადამიანს გამორჩენოდა და მისთვის გადაცემის დიდი ნაწილი არ დაეთმო.

სავარაუდოდ, ინგლისელი კომიკოსი შესავალ სიტყვას ასე დაიწყებდა: ისრაელმა პალესტინელებთან კონფლიქტის მოსაგვარებლად ისტორიული შანსი გაუშვა ხელიდან. ნაცვლად იმისა, რომ ეს შემთხვევა პროპაგანდისთვის გამოეყენებინათ და პალესტინელებს სასწაულებით სავსე ცხოვრებას დაჰპირებოდნენ, რა გააკეთეს ებრაელებმა? - ადგნენ და საშოვარზე ჩასული ქართველი წილხვედრში დააბრუნეს, სადაც მას უიმედობა, უმუშევრობა და შიმშილი ელოდა, ამით კი ათასობით არალეგალი ემიგრანტის რიცხვი, ერთი მემილიონედი პროცენტით შეამცირეს.

ამ შესავალს კი, ჯონ ოლივერი, ჩვეულ სტილში, სარკასტული იუმორით გაჟღენთილ სოციალურ თეორიას მოაყოლებდა, თუ რატომ გარბიან ქართველები ისრაელში სამუშაოდ და მის ნათქვამს ყველა გაიგებდა, მათ გარდა, ვისაც ნამდვილად უნდა გაეგო.

8. 15 ძირი კანაფის დათესვა-მოყვანის ბრალდებით გურიაში პატრულ-ინსპექტორი დააკავეს

• 15 ძირი კანაფის დათესვა-მოყვანის ბრალდებით გურიაში პატრულ-ინსპექტორი დააკავეს;

ეს ამბავი ჯონ ოლივერისთვის ნამდვილი პოლიტიკური მანიფესტის ინსპირაცია გახდებოდა. მისი მაყურებლებისთვის კარგად ნაცნობია, რომ ინგლისელ კომიკოსს უყვარს სიღრმისეული განხილვა საკითხის. შესაბამისად, ნარკოპოლიტიკა მისთვის საყვარელი თემა იქნებოდა საქართველოში.

მისი შესავალი სიტყვა კი, შესაძლოა, ასეთი ყოფილიყო: მარიხუანის მომხმარებლების რამდენიმე წლიანი დევნის შემდეგ, დაღლილმა გურულმა პატრულ-ინსპექტორმა გადაწყვიტა შეემეცნა რის გამო იჭერდა ადამიანებს და პროფესიული გამოცდილების ასამაღლებლად 15 ძირი კანაფი დათესა, თუმცა სისტემამ, რომელსაც ის წლების განმავლობაში ემსახურებოდა, მასში მონდომება ვერ დაინახა და თავი ციხეში უკრა.

რას ვიზამთ, ხშირად, ჯონ ოლივერი სასაცილო მეტად, ბრუტალურია.

7. იტალიაში ქუთაისის მერის პორტრეტი გამოფინეს

• იტალიაში ქუთაისის მერის პორტრეტი გამოფინეს;

ჯონ ოლივერმა რომ იცოდეს, ასეთი ნიუსის განხილვის საშუალება ჰქონდა, ალბათ სასწრაფოდ მიიღებდა საქართველოს მოქალაქეობას.

მისი სცენარისტების ნაცვლად კი, შესავალი სიტყვა ჯონ ოლივერს "ერთიანი ნაციონალური მოძრაობის" ქუთაისის ოფისის წარმომადგენელმა, გიგა შუშანიამ მოუმზადა, რომელიც საკუთარ ფეისბუქზე წერდა:

"ქუთაისის მერი ბიუჯეტის ხარჯზე იტალიაში გაჰყვა მხატვრებს, სადაც "საზეიმო" ვითარებაში გამოფინა, არც მეტი, არც ნაკლები, საკუთარი სურათი. იტალიელები აღფრთოვანებული შეხვედრიან ამ ამბავს, დიდი "პატივია", რომ "მსოფლიო დონის" "სახელმწიფო მოღვაწის" პორტრეტი პირველად ჩვენთან გამოიფინაო. ახლა ქუთაისის მერიისა და აიპების 4 300 თანამშრომლის მოთხოვნით, ეს სურათი ჩამოვა ქუთაისში და მის გადათხრილ ქუჩებში მოეწყობა დემონსტრაციები, სადაც "მადლიერი" მოსახლეობა მიესალმება ქუთაისის მერის სურათს, ასევე გაიჟღერებს მერისადმი მიძღვნილი ლექსები და სიმღერები."

6. ცესკოს თანამშრომლის თქმით, მის ფეისბუქზე ზურაბიშვილის მხარდამჭერი ინფორმაცია ქმარმა გააზიარა

• ცესკოს თანამშრომლის თქმით, მის ფეისბუქზე ზურაბიშვილის მხარდამჭერი ინფორმაცია ქმარმა გააზიარა;

ჯონ ოლივერი ამ ნიუსის წაკითხვის შემდეგ იტყოდა: იოზეფ გებელსის შემდეგ, გასულ კვირას, მსოფლიო შოკში ჩააგდო უნიჭიერესად დაწერილმა პროპაგანდისტულმა მესიჯმა და მთელი საქართველო სიამაყით აივსო, რომ ქვეყანაში კიდევ ერთი გენიოსი აღმოაჩინეს, თუმცა მისი ნიჭი მატრიარქატის მძიმე შედეგების გამო ითრუგნება, რადგან ცოლი ქმარს საშუალებას არ აძლევს საკუთარი ფეისბუქი შექმნას, ამიტომ დაჩაგრული ქმარი მეუღლის პროფილზე იპარება და მოძალებულ მუზას უხსნის გზას ფართოს.

...და შემდეგ, აუცილებლად იტყოდა, რომ ცესკო პასუხისმგებელია არჩევნების დამოუკიდებელ და სამართლიან გარემოში ჩატარებაზე, რომელშიც თავისი თავისუფალი არჩევანი უნდა დააფიქსირონ საქართველოს მოქალაქეებმა, ამ ორგანოს თანამშრომლებს კი, საკუთარი ქმრების დამოუკიდებელი და რაციონალური მსჯელობისაც კი არ სწამთ, არათუ მთელი ქვეყნისა.

5. პოლიციამ განყოფილებაში ბაყაყი გადაიყვანა

• პოლიციის ფესტივალი;

რამდენიმე თვის წინ თბილისში, დედაენის ბაღში გირჩმა მარიხუანის ფესტივალი ჩაატარა, რომელიც არც თუ წარმატებულად განვითარდა. ადგილზე მისულმა პოლიციამ ჯერ პარტიის ლიდერი დააკავა, შემდეგ კი ბაყაყი, მელია, დათვი, მგელი და სხვ.

ჯონ ოლივერი ამ თემაზე შესავალ სიტყვას ალბათ ასე დაიწყებდა: ქართველმა აქტივისტებმა იმდენი იძახეს, დრაკონულ პოლიტიკას ვეწირებითო, რომ ქართულმა პოლიციამ, როგორც იქნა, ნამიოკი შეისმინა და ადამიანების დაჭერიდან ცხოველების დაპატიმრებაზე გადავიდა. სავრაუდოდ, ახლა პოლიციის განყოფილებაში არკვევენ, რა კავშირი აქვთ დათვს, მელიას, ბაყაყსა და მგელს დრაკონთან.

4. აკაკი ასათიანმა კახა კუკავას სასარგებლოდ საპრეზიდენტო არჩევნებიდან საკუთარი კანდიდატურა მოხსნა

• საპრეზიდენტო არჩევნების ორმა მონაწილემ საკუთარი კანდიდატურა კახა კუკავას სასარგებლოდ მოხსნა;

რა შეიძლება ამ ნიუსზე ითქვას? ჯონ ოლივერს ეს ინფორმაცია საერთოდაც სცენარისტების დაწერილი ხუმრობა ეგონებოდა და მისთვის დამახასიათებელი მანევრულობით წაიკითხავდა, ბოლოს კი მიამატებდა:

"რის შემდეგაც აკაკი ასათიანის საარჩევნო შტაბის ერთ-კაციანი ამალა უმუშევარი დარჩა!".

3. წულუკიანის ინიციატივით, პატარძალს ქორწინების მოწმობასთან ერთად სამზითვო ვეფხისტყაოსანი გადაეცემა

• წულუკიანის ინიციატივით, პატარძალს ქორწინების მოწმობასთან ერთად სამზითვო ვეფხისტყაოსანი გადაეცემა;

ხომ ყველას გახსოვთ ეს ახალი ამბავი?

ჯონ ოლივერი კადრს მიღმა ამ სიახლეზე ალბათ ბევრს იცინებდა, შემდეგ დამშვიდდებოდა და ეთერში გასვლისას, ისევ ბევრს იცინებდა.

მისი სცენარისტები კი, რაიმე ორიგინალური ტექსტის დაწერის ნაცვლად, უბრალოდ ინტერნეტის რეაქციებს ამოიღებდნენ, რომელთა ნაწილსაც ჩვენც შემოგთავაზებთ.

თუ გავითვალისწინებთ, რომ ეს სიახლე წინასაარჩევნოდ გაჟღერდა, მაშინ შესაძლოა, ეს მომხმარებელი მართალიც კი იყო, როცა წინასწარი პროგნოზი გააკეთა.

და მაინც, განქორწინების შემთხვევაში, ვის დარჩება ვეფხისტყაოსანი? - საკითხავი, აი, ეს არის.

2. მე ვარ ქალი და კაცზე ხელს არასდროს ავწევ — ირმა ინაშვილი

• მე ვარ ქალი და კაცზე ხელს არასდროს ავწევ — ირმა ინაშვილი;

2018 წელი საქართველოს საკანონმდებლო ორგანოსთვისაც დატვირთული აღმოჩნდა, ოღონდ უმეტესად ჩხუბითა და კამათით.

ამ მხრივ, ერთ-ერთი ყველაზე გამორჩეული ბოლო მოვლენები იყო, როცა ირმა ინაშვილი ნიკა მელიას პარლამენტის გარეთ საქმის გასარჩევად ეპატიჟებოდა.

სხვათაშორის, ამავე კომპოზიციაში უნდა გავიხსენოთ ზაზა პაპუაშვილის კომენტარიც, რომელმაც შემდეგი განცხადება გააკეთა: ზურგიდან არავის ვეპარები, მინდოდა, მელიასთვის ქეჩოში მომეკიდა ხელი.

ეს განცხადებები ჯონ ოლვერისთვის ნამდვილი ოქროს საბადო იქნებოდა. ის იტყოდა: საგულისხმოა, რომ ირმა ინაშვილმა გარკვევით თქვა, ხელს არ ავწევო. ყურადღება შეკითხვა: სხვას რას აწევდა ირმა ინაშვილი? - და შემდეგ განიხილავდა მაგალითებს.

ისე, შალვა ნათელაშვილის კომენტარის არ გამორჩებოდა ჯონ ოლივერს.

1. მეუფე იაკობი პატრიარქის ნებართვას ელის, რომ ერთ-ერთი ბიზნესმენი სცემოს

• მეუფე იაკობი პატრიარქის ნებართვას ელის, რომ ერთ-ერთი ბიზნესმენი სცემოს;

აი, ჩვენი ათეულის კულმინაცია, ორი დღის წინ გაკეთებული განცხადებაა, რომელიც ტაბულამ გაავრცელა და რომელმაც 2018 წლის ყველა ნიუსი გადაწონა.

ჯონ ოლივერი ამ ნიუსს უკომენტაროდ დატოვებდა, ოღონდ ასე: მიუხედავად იმისა, რომ საპატრიარქოში უკვე ორ წელიწადზე მეტია დიდი არეულობაა და ვერავინ გაიგო, რა ხდება სინამდვილეში, თუმცა მთელი საზოგადოება ეჭვით არის შეპყრობილი გიორგი მამალაძის საქმესთან, შორენა თეთრუაშვილთან, საპატრიარქოსა და რუსეთის ურთიერთობებთან, წმინდა სინოდის გადაწყვეტილებებთან, ძალაუფლებისთვის ბრძოლასთან დაკავშირებით, მეუფე იაკობი მაინც ახერხებს ფორმის შენარჩუნებას და ოქტაგონზე საქმის გასარჩევად ერთ-ერთ ბიზნესმენს ეპატიჟება, ოღონდ მხოლოდ და მხოლოდ პატრიარქის კურთხევის შემდეგ.

ამას იტყოდა ჯონ ოლივერი და როგორც სჩვევია ხოლმე, გაიღიმებდა.