თელავში ერეკლე მეფის სასახლეში ინაუგურაციის ღონისძიებაზე ყველა სტუმარი ფეხზე იდგება. როგორც მთავრობის ადმინისტრაციის უფროსმა, კახა კახიშვილმა რუსთავი 2-ს უთხრა, რომ სკამები იქნება მხოლოდ პატრიარქისთვის, კონფესიის წარმომადგენლობისთვის, შშმ პირებისთვისა და ხანდაზმული ადამიანებისთვის.

მისივე თქმით სტუმრები ფეხზე იდგებიან, რათა საინაუგურაციო პროცესში უფრო მეტმა ადამიანმა რომ მიიღოს მონაწილეობა.

"თავიდან იყო მოსაზრება, რომ ნაწილი ხომ არ იჯდეს და ნაწილი ხომ არ იდგეს, რაც ჩემი და ყველას აზრით, არ იქნებოდა სწორი, რომ ვიღაც იჯდეს და ვიღაც იდგეს. ამიტომ იყო მიღებული გადაწყვეტილება, რომ ყველა ფეხზე იდგეს, ვისაც ჯანმრთელობა ხელს შეუწყობს", — განაცხადა კახიშვილმა.

საქართველოს მეხუთე და ბოლო არჩეული პრეზიდენტის, სალომე ზურაბიშვილის ინაუგურაციის ცერემონიას მსოფლიო პრეზიდენტებიდან მხოლოდ სომხეთის პრეზიდენტი არმენ სარქისინია დაესწრება. საქართველოს საგარეო საქმეთა სამინისტროს ცნობით, ინაუგურაციის მონაწილეობას მსოფლიოს 55-მდე ქვეყნის 150-მდე წარმომადგენელი მიიღებს.

უწყების ცნობით, საქართველოს ეწვევიან მაღალი რანგის სტუმრები 20-ზე მეტი ქვეყნიდან და 16 საერთაშორისო ორგანიზაციის წარმომადგენელი. ცნობილია, რომ ინაუგურაციას დაესწრება საქართველოს მეოთხე პრეზიდენტი, გიორგი მარგველაშვილიც.

სალომე ზურაბიშვილმა თელავში არჩევნები წააგო. მისი თქმით, სწორედ ამის გამო გადაწყვიტა ინაუგურაცია არა რეგლამენტით განსაზღვრულ ადგილზე, არამედ თელავში გაემართა. რეგლამენტით პრეზიდენტის ინაუგურაცია საქართველოს პარლამენტის ეზოში უნდა ჩატარებულიყო, თუმცა მთავრობამ ახალი განკარგულება გამოსცა და ახალ პრეზიდენტს გადაწყვეტილების მიღების თავისუფლება მისცა.

ინაუგურაციის პარალელურად თელავში გაერთიანებული ოპოზიციის აქცია გაიმართება. თელავის მერია კი ინაუგურაცისთან დაკავშირებით 14, 15 და 16 დეკემბერს 13:00 საათიდან 15:00 საათამდე ქვემეხებიდან ერთობლივად გაისვრის.