ჩვენ შევკრიბეთ ის მთავარი სამეცნიერო სიახლეები, რომლებიც შეიძლება დატვირთული კვირის განმავლობაში გამოგრჩენოდათ.

1. ვირტუალურ რეალობაში შექმნილი სიმულაცია, შავი ხვრელის რეალისტურ წარმოსახვას გვთავაზობს

რადბუდისა და გოეთეს უნივერსიტეტების მეცნიერებმა ჩვენი გალაქტიკის ცენტრში არსებული შავი ხვრელის უახლესი ასტროფიზიკური მოდელების გამოყენებით მისი 360-გრადუსიანი სიმულაცია მიიღეს. ავტორების თქმით, ვირტუალური სიმულაცია ასტრონომიისა და ასტროფიზიკისაკენ საზოგადოების ინტერესს გააღრმავებს.

გაიგეთ მეტი: http://go.on.ge/we0

2. მარსზე რობოტ ExoMars-ის დაშვების ადგილი შეირჩა

ევროპულ-რუსული მისია მარსზე 2021 წელს, ეკვატორიდან ჩრდილოეთით, კრატერ Oxia Planum-ზე დაეშვება. მეცნიერები ვარაუდობენ, რომ Oxia Planum ერთ დროს ტბით იყო დაფარული. რობოტის მთავარი მისია მარსზე წარსულში არსებული შესაძლო სიცოცხლის კვალის პოვნაა.

წყარო: The Guardian

3. არსებობს თუ არა იდეალური ასაკი ბავშვის გასაჩენად? აი, რას ამბობს მეცნიერება

კვლევის ფარგლებში მეცნიერებმა გააანალიზეს, თუ რა გავლენა აქვს ნაყოფიერებაზე ასაკსა და სხვა ფაქტორებს. ადამიანების უმეტესობას მიაჩნია, რომ ხელოვნური განაყოფიერება მარტივი და სანდო პროცედურაა, თუმცა ბევრს ავიწყდება, რომ ის თავისმხრივ დამატებით რისკებთან არის დაკავშირებული. კვლევის შედეგად მეცნიერებმა დაადგინეს ასაკის ზღვარი, რის შემდეგაც ბავშვის გაჩენასთან დაკავშირებული რისკები საგრძნობლად იმატებს.

გაიგეთ მეტი: http://go.on.ge/we9

4. ასტრონომებმა მზის ტყუპისცალი ვარსკვლავი აღმოაჩინეს

მიჩნეულია, რომ მზეს უნდა ჰყავდეს ტყუპისცალი ვარსკვლავი, რომელიც კოსმოსის იმავე რეგიონში, იმავე დროს, იმავე გარემოში დაიბადა, რომელშიც ჩვენი მზე. ამის მიზეზი ისაა, რომ ვარსკვლავები, როგორც წესი, ჯგუფებად იბადებიან, შემდეგ კი იფანტებიან. ახლად აღმოჩენილი ვარსკვლავი HD186302 ჩვენგან 184 სინათლის წლით არის დაშორებული და ის მზეს უკიდურესად წააგავს.

წყარო: ScienceAlert

5. სადღესასწაულო სიმღერებმა შესაძლოა თქვენი ფსიქიკური ჯანმრთელობა დააზიანოს

ცნობილია, რომ ტვინზე ერთი და იგივე გამღიზიანებლის ხანგრძლივი მოქმედება უარყოფითად მოქმედებს. ახალი წლის პერიოდში კი, ეს პრობლემა განსაკუთრებით აქტუალურია. საახალწლო სიმღერები გავლენას შეიძლება თქვენს პროდუქტიულობაზეც ახდენდეს. ამიტომ აუცილებელია, რომ ახალი წლის პერიოდში სიმღერების შერჩევას უფრო მეტი დრო დავუთმოთ.

გაიგეთ მეტი: http://go.on.ge/whi

6. ბუნებრივი რადიოაქტიური წყარო ანტარქტიკას შიგნიდან ალღობს

რადარულ მონაცემებზე დაყრდნობით, მეცნიერებმა აღმაოჩინეს, რომ ანტარქტიკის ძირში არსებობს რადიაციის ბუნებრივი წყარო, რომელიც ყინულის ლღობას იწვევს. მეცნიერების თქმით, აღნიშნული პროცესი სავარაუდოდ ათეულობით ათასი წელია, რაც მიმდინარეობს.

წყარო: Business Insider

7. საერთაშორისო კოსმოსურ სადგურზე მეცნიერებმა რეზისტენტული ენტერობაქტერიები აღმოაჩინეს

საერთაშორისო კოსმოსურ სადგურზე არსებული ტუალეტიდან და სხვა სავარჯიშო მოწყობილობებიდან აღებულ ნიმუშებში მეცნიერებმა ენტერობაქტერიის ხუთი სხვადასხვა მრავალ რეზისტენტული შტამი აღმოაჩინეს. კოსმოსში პათოგენური ორგანიზმების არსებობა სამომავლო მისიებისთვის დიდი საფრთხეა.

გაიგეთ მეტი: http://go.on.ge/wkv

8. უკონტაქტო ტომთან კომუნიკაციის დამყარების მცდელობისას, აბორიგენებმა ამერიკელი ტურისტი მოკლეს

ჩრდილოეთ სენტინელის კუნძულზე დედამიწაზე ერთ-ერთი უკანასკნელი გარესამყაროს მოწყვეტილი ტომი ცხოვრობს, რომელიც კონტაქტის მცდელობებს მუდმივად აგრესიით პასუხობს, მათ ცხადად მიგვანიშნეს, რომ ჩვენთან კონტაქტი არ სურთ. ამერიკელ ტურისტს კუნძულზე ქრისტიანობის გავრცელება სურდა და ის იქ მეთევზეების ნავით უკანონოდ მოხვდა, რა დროსაც ის ისრით მოკლეს.

წყარო: iflscience

9. ვეშაპების ყურის გოგირდის შესწავლისას მეცნიერები საინტერესო დასკვნამდე მივიდნენ

ვეშაპების ყურებში დაგროვებული გოგირდის ფენების შესწავლისა და დათარიღებისას, მეცნიერებმა დაადგინეს, რომ მეორე მსოფლიო ომის დროს მათში კორტიზოლის, ანუ სტრესის ჰორმონის დონემ მოიმატა. კორტიზოლის მომატება ასევე ფიქსირდება იმ პერიოდებში, როდესაც ვეშაპებზე ნადირობა ხშირი იყო.

გაიგეთ მეტი: http://go.on.ge/wjk

10. 179 სინათლის წლით დაშორებული ეგზოპლანეტის ატმოსფეროში წყალი დაფიქსირდა

ეგზოპლანეტების შესწავლა ექსტრემალური დისტანციებისა და მათი სიმკრთალის გამო ძალიან რთულია, თუმცა, განახლებული ოპტიკისა და მაღალი გარჩევადობის სპეციალური ინფრაწითელი სპექტრომეტრის დახმარებით, მეცნიერებმა ეგზოპლანეტიდან წამოსულ სინათლეში წყლის კვალი დააფიქსირეს.

წყარო: ScienceAlert