დღესასწაულების წინ, კომპანიები გამართლებულ სტრატეგიას კიდევ ერთხელ აბრუნებენ და ახალ-ახალ ნივთებს გვთავაზობენ, რომლებითაც უნდა გავახაროთ ოჯახის წევრები, მეგობრები, თანამშრომლები, საყვარელი ადამიანები და... მასწავლებლები.

შოტლანდიაში მშობელთა ორგანიზაცია Connect აცხადებს, რომ მშობლები კარგად უნდა დაფიქრდნენ, სანამ შვილების მასწავლებლებს ძვირიან საჩუქრებს უყიდიან. ისინი მოუწოდებენ ადგილობრივ მშობელთა საკონსულოებსა და მშობლებისა და მასწავლებლების ასოციაციას, რომ სადღესასწაულო სეზონის წინ, მასწავლებლებისთვის საჩუქრის ყიდვის ტრადიციას გადახედონ და დასძენენ, რომ ზოგი საჩუქარი 100 გირვანქა სტერლინგზე [340 ლარი] მეტი ღირს.

"ჩვენ გვესმის, რომ მშობლებს სურთ, შვილების მასწავლებლებისთვის მადლიერებისა და პატივისცემის ჩვენება, მაგრამ წელს მშობლებს მოვუწოდებთ, რომ გამონაკლისი დაუშვან და კარგად გაიაზრონ, რას აკეთებენ. ხშირად გულით ნათქვამი "მადლობაც" საკმარისია", - ამბობს Connect-ის დირექტორი ელენ პრიორი.

პრიორი დასძენს, რომ ეს ტრადიცია საშობაოდ სტრესში აგდებს როგორც მშობლებს, ისე — ბავშვებს. ის ამბობს, რომ მასწავლებლებისთვის საჩუქრის შეძენის დროს მოსწავლეების ოჯახებს შორის არსებული განსხვავებული ფინანსური შესაძლებლობები აშკარა ხდება.

"ჩვენ დაგვიკავშირდა უამრავი დასტრესილი მშობელი, რომლებსაც 10 გირვანქა სტერლინგის მიტანა სთხოვეს მასწავლებლის საჩუქრისთვის. თუ ისინი ამ თანხას არ ან ვერ გადაიხდიან, ეუბნებიან, რომ მისალოც ბარათზე მათი შვილის სახელი არ იქნება", - დასძენს ის.

Connect-ის ერთ-ერთი უკანასკნელი კვლევა, რომელიც ოჯახების ფინანსურ პრობლემებს ეხებოდა, აღწერს იმ სიტუაციას, რომელშიც სკოლა ხშირად აგდებს მშობლებს.

შოტლანდიის მშობელთა გაერთიანებას უამრავი ორგანიზაცია შეუერთდა და ამ ინიციატივაში მხარდაჭერა გამოუცხადა. მათ შორის ბავშვთა სიღარიბის დაძლევაზე მომუშავე ჯგუფი (CPAG) და შოტლანდიის განმანათლებელი ინსტიტუტი (EIS).

"ჩვენ ვიცით, რამდენი მშობელი და აღმზრდელი განიცდის გაჭირვებას. ხანდახან მათ იმათზე უწევთ ფიქრი, თუ როგორ გაძლონ დღის ბოლომდე. მასწავლებლებისთვის საჩუქრების შერჩევა მათთვის დამატებითი წნეხია, როდესაც ისინი ფიქრობენ, რომ საკუთარ შვილებს იმედები ვერ გაუმართლეს", - ამბობს დიდი ბრიტანეთის ეროვნული განათლების კავშირის მდივანი, კევინ კორტნი.

ის დასძენს, რომ მასწავლებლები საჩუქრებს არ უნდა მოელოდნენ, ხოლო მშობლებს არ უნდა ეშინოდეთ, რომ თუ საჩუქრებს არ მიართმევენ, მასწავლებლებს მათი შვილების მიმართ დამოკიდებულება შეეცვლებათ.

CPAG-ის ხელმძღვანელის ჯონ დიკის სიტყვებით, ძვირფასი საჩუქრები უხერხულ მდგომარეობას უქმნის მასწავლებლებსაც და ისინი ასევე ითხოვენ ამ "ტრადიციის" გადახედვას.