სერვისები განვითარების სააგენტო მეორე ტურისთვის ყალბი პირადობის მოწმობების შესაძლო დამზადების ბრალდებას უარყოფს და "გაუგონარს უწოდებს". სააგენტოს თავმჯდომარის, სოსო გიორგაძის თქმით, არასამთავრობოების ბრალდებეა "აბსურდულ" წინადადებებსა და არგუმენტებს ეფუძნება.

"ჩემთვის არამხოლოდ გაუგონარია, რაზეც ეს ადამიანები საუბრობს, არამედ თეორიულადაც წარმოდგენაა რთული იმისა თუ რასაც გვაბრალებენ", — განაცხადა გიორგაძემ ბრიფინგზე.

მისივე თქმით, მან მიმართა იუსტიციის სამინისტროს გენერალურ ინსპექციას, რათა აღნიშნულ საკითხთან დაკავშირებით მათ გამოძიება დაიწყონ.

გიორგაძემ განაცხადა, რომ საარჩევნო სიებთან დაკავშირებით სადამკვირვებლო საერთაშორისო კომპანიების მხრიდან არსებობს ნდობა.

რაც შეეხება პირადობის მოწმობების ბეჭდვას, გიორგაძემ განმარტა, რომ ბიომოტერიული დოკუმენტები, მათ შორის, პირადობის მოწმობები, საქართველოში მხოლოდ სამ ადგილას იბეჭდება: თბილისში, ქუთაისსა და ბათუმში. მისივე თქმით, შესაბამისად პირადობები ვერ დაიბეჭდებოდა წალენჯიხასა და გარდაბანში, როგორც ამას არასამთავრობოები ამბობენ.

გიორგაძემ, ასევე, უპასუხა გარდაბნისა და წალენჯიხის ტერიტორიული სამსახურების ხელმძღვანელების მივლინებების საკითხს. მისივე თქმით, სააგენტოს 1 300-ზე მეტი თანამშრომლები ჰყავს და "არ არსებობს დღე, როცა ვიღაც არ არის მივლინებაში"

"ბრალდება იმასთან დაკავშირებით, რომ საარჩევნო ჩვენ ყალბ პირადობის მოწმობებს ვბეჭდავთ, თავისთავად არის ყალბი", — განაცხადა გიორგაძემ.

მისივე თქმით, თუ საუბარია საარჩევნო სიის გაზრდაზე მაშინ არასამთავრობოებმა მას კონკრეტული ციფრები უნდა წარუდგინონ:

"საარჩევნო სია შედგება კონკრეტული ადამიანების რაოდენობისგან და კონკრეტულად საქართველოს მოქალაქეებისგან. ეს არის ციფრები, ციფრები არის მათემატიკა, რომელიც არის ზუსტი მეცნიერება".

დღეს, 20 ნოემბერს სამმა არასამთავრობო ორგანიზაციამ განაცხადა, რომ საპრეზიდენტო არჩევნების მეორე ტურისთვის სალომე ზურაბიშვილის მხარდასაჭერად, სავარაუდოდ, ყალბი პირადობის მოწმობები იბეჭდება. ამის შესახებ ინფორმაცია მათ სახელმწიფო სერვისების განვითარების სააგენტოში დასაქმებულმა ერთ-ერთმა თანამშრომელმა მიაწოდა.

როგორც მათ წყარომ უთხრა, ამ პროცესს ხელმძღვანელობენ სახელმწიფო სერვისების განვითარების სააგენტოს თავმჯდომარე სოსო გიორგაძე და ამავე სააგენტოს შიდა აუდიტის სამსახურის უფროსი ბეჟან ობგაიძე. წყაროს თქმით, პირადობის მოწმობები სააგენტოს რამდენიმე ტერიტორიულ სამსახურში იბეჭდება.

არასამთავრობოების განცხადებაში ვკითხულობთ, რომ წყაროს თქმით, იმ რეგიონებში, სადაც ტერიტორიული სამსახურის ხელმძღვანელები არ არიან "სანდო" პირები, ისინი მივლინებაში გაუშვეს, ხოლო მათ ადგილას "სანდო" პირები მიავლინეს.

"წყაროს ინფორმაციით, ასეთ "არასანდო" პირებად მიჩნეულნი იყვნენ სააგენტოს წალენჯიხის ტერიტორიული სამსახურის ხელმძღვანელი არკადი ფიფია და გარდაბნის ტერიტორიული სამსახურის ხელმძღვანელი ზურაბ ხვედელიძე. წალენჯიხაში ტერიტორიული სამსახურის ხელმძღვანელი მისი მივლინებაში ყოფნის განმავლობაში მანუჩარ ნაჭყებიამ ჩაანაცვლა. მივლინებაში ყოფნა არკადი ფიფიამ ჩვენს წარმომადგენლებს დაუდასტურა. მოპოვებული ინფორმაციით, სავარაუდოდ ასევე, მივლინებაში იმყოფება ზურაბ ხვედელიძე, რომლის მოვალეობასაც გვანცა მენაფირე ასრულებს".

აღნიშნულ საქმესთან დაკავშირებით პროკურატურამ გამოძიება უკვე დაიწყო.