ხანგრძლივი მოლოდინის შემდეგ, ნეტფლიქსის სერიალი, ბანქოს სახლი 2 ნოემბერს ბრუნდება, თანაც ფინალური სეზონით.

ახალ სეზონთან დაკავშირებით ყველაზე მნიშვნელოვანი რაც ვიცით არის ის, რომ შოუში აღარ იქნება კევინ სპეისი და მთელი აქცენტი ამერიკის ახალ პრეზიდენტ კლერ ანდერვუდზე გაკეთდება.

პრემიერამდე ჯერ კიდევ ერთ კვირაზე მეტია დარჩენილი, თუმცა კრიტიკოსებს ჰქონდათ საშუალება შოუს ფინალური სეზონის რამდენიმე ეპიზოდი ენახათ.

როგორც აღმოჩნდა, შედეგმა მოლოდინს გადააჭარბა და House of Cards-ის უკევინსპეისო სეზონმა კრიტიკოსებისგან საუკეთესო შეფასებები დაიმსახურა.

Variety-ის კრიტიკოსი წერს, რომ მიუხედავად არც თუ ისე დიდი მოლოდინისა, შოუს ფინალური სეზონი იმაზე გაცილებით შთამბეჭდავია, ვიდრე სხვა სეზონები.

"ფრენკ ანდერვუდი მკვდარია და ეს ყველამ ვიცით. როგორც აღმოჩნდა, ამას ხელი არ შეუშლია სერიალის შემქმნელებისთვის, რომ ერთ-ერთი საუკეთესო სეზონი გადაეღოთ. აღსანიშნავია რობინ რაითის ბრწყინვალე შესრულება, რომელმაც მაყურებელს აჩვენა, რომ ის ბანქოს სახლის მთავარი მოთამაშეა", - წერს რივიუში დენიელ დადარიო.

The Hollywood Reporter-ის ტელეკრიტიკოსი, დენიელ ფინბერგი რობინ რაითსა და შოუს სხვა მსახიობებს მადლობას უხდის იმისთვის, რომ სერიალს საერთოდ არ ეტყობა უკევინსპეისობა.

"თუ თქვენ ბანქოს სახლის ახალ სეზონს ნახავთ, გვერწმუნეთ, საერთოდ ვერ იგრძნობთ, რომ შოუში კევინ სპეისი არ არის. ამისთვის დიდი მადლობა რობინ რაითს, დაიან ლინსა და გრეგ კინერს, რომლებმაც მოახერხეს და ნეტფლიქსის შოუს ახალი სიცოცხლე შესძინეს. ფინალური სეზონის ყურების დროს, გაქვს განცდა რომ სრულიად სხვა, ახალ და ორიგინალურ სერიალს უყურებს, რომელიც იმსახურებს იმას, რომ გაგრძელდეს", - წერს ფინბერგი.

House of Cards-ის ფინალურ სეზონს ხუთიდან სამი ვარსკვლავი მიანიჭა ტელეგრაფმა. ედ პოვერი წერს, რომ რობინ რაითმა აღებულ პასუხისმგებლობას თავი ბრწყინვალედ გაართვა და შოუ გადაარჩინა.

სერიალს დადებითად აფასებს Baltimoresun-ის კრიტიკოსი დევიდ ზურავიკი და ხაზს უსვამს იმ თემებს, რომლებზეც ფინალურ სეზონში აქცენტი კეთდება.

"გენდერი, მიზოგენია, ოლიგარქია, ავტოკრატია, მხდალი პოლიტიკოსები - ეს ის თემებია, რომლებიც ბანქოს სახლის იმ ხუთ სერიაში მთავარი დასაყრდენია, რომლებიც ჩვენთვის [კრიტიკოსებისთვის] გასულ ღამეს ხელმისაწვდომი გახდა. სერიალმა, უფრო მეტად კი რობინ რაითმა ბანქოს სახლი ჩამოშლისგან იხსნეს", - წერს ზურავიკი.

Slashfilm-ის მიმომხილველი, კრის ევანგელისტა კი ფინალურ სეზონს სერიალის ისტორიაში ერთ-ერთ საუკეთესო სეზონს უწოდებს.

"ბანქოს სახლის ფინალური სეზონი, უკანასკნელი წლების საუკეთესო ნამუშევარია. გვაძლევს საშუალებას ბოლომდე გადავეშვათ კლერ ანდერვუდის საშიშ და ბნელით მოცულ სამყაროში და ეს იმდენად დიდი თავგადასავალია, მისი დავიწყება მაყურებელს გაუჭირდება", - წერს ტელეკრიტიკოსი.

აღსანიშნავია, რომ ფინალურ სეზონთან დაკავშირებით, მაყურებელს არც თუ ისე დიდი მოლოდინი ჰქონდა, ინტერნეტსივრცეში წერდნენ, რომ ფრენკ ანდერვუდის (კევინ სპეისი) პერსონაჟის გარეშე შოუ ვერ შედგებოდა, თუმცა, თუ კრიტიკოსებს დავუჯერებთ, ნეტფლიქსმა ბანქოს სახლის ერთ-ერთი საუკეთესო სეზონი გადაიღო. ჩვენ კი ისღა დაგვრჩენია, 2 ნოემბერს დაველოდოთ და თავად შევაფასოთ, გადაარჩინა თუ არა რობინ რაითმა ბანქოს სახლი ჩამოშლისგან.