"არ ვიცი, რასაც ახლა ვიტყვი, სანანებელი გამიხდება თუ არა", - თქვა სარა სილვერმანმა ჰოვარდ სტერნის რადიოშოუში, სანამ ლუის სი ქეის შესახებ დაიწყებდა საუბარს. 47 წლის კომიკოსის თქმით, ლუის სი ქეი, რომელსაც სექსუალურ შევიწროებაში რამდენიმე ქალი ადანაშაულებს, მის თვალწინაც მასტურბირებდა, თუმცა ამ ქალებისგან განსხვავებით – მისი თანხმობით.

"ლუის მთელი ცხოვრებაა, ვიცნობ და მისთვის გასამართლებელ საბუთებს არ ვეძებ, ასე რომ, ჩემს სიტყვებს ასე ნუ გაიგებთ. ჩვენ თითქმის თანატოლები ვართ. ასევე - თანასწორები. როცა პატარები ვიყავით, ის მეკითხებოდა ხოლმე, შეიძლებოდა თუ არა ჩემ თვალწინ მასტურბირება. ხანდახან ვეუბნებოდი: "რატომაც არა! სიამოვნებით გიყურებდი"... მესმის, რომ ეს იგივე არაა, რაც სხვა ქალებმა მის გამო გამოიარეს. მას ჩემთვის არაფრის შემოთავაზება არ შეეძლო. უბრალოდ მეგობრები ვიყავით. ასე რომ, კი, ხანდახან მინდოდა ამის ნახვა და ყველაფერი არაჩვეულებრივად იყო. ხანდახან კი ვეუბნებოდი: "ფუ, არა" და უბრალოდ პიცის საჭმელად მივდიოდით".

სილვერმანის აზრით, ეს ისტორია იმას ადასტურებს, რომ ლუი საკუთარი ქმედებების შედეგს ვერ აცნობიერებდა, ისევე, როგორც მოულოდნელ პოპულარობასა და ახლადშეძენილ ძალაუფლებას, რომელიც ასეთ წარმატებას მოჰყვება.

"იმას არ ვგულისხმობ, რომ რაც მან გააკეთა, სწორია, მე უბრალოდ ვამბობ, რომ გარკვეულ მომენტში ის გავლენიანი გახდა - ცნობილიც კი არა, უბრალოდ გავლენიანი კომედიის სამყაროში და ეს ბევრ რამეს ცვლის. ლუიმ ეს გააცნობიერა, თუმცა ბევრად უფრო გვიან, ვიდრე ნიუ-იორკ თაიმსმა [პირველად სწორედ ნიუ-იორკ თაიმსმა დაიბეჭდა ლუის წინააღმდეგ ბრალდებები]. იმ თავდაპირველ სტატიაშიც კი ნათქვამია, რომ ლუიმ ამ ქალებთან დაკავშირება სცადა, რათა ეთქვა: ვიცი, რომ ცუდად მოგექეცი, მინდა, რომ ეს გამოვასწორო".

სილვერმანი ამბობს, რომ "აუცილებელი არაა, ლუი ყველამ თავიდან შეიყვაროს" და შესაძლოა, ლუისთან მეგობრობის გამო სიტუაციის ობიექტურად განსჯა უჭირდეს.

"ლუი მიყვარს. ის ჩემი ძმაა. მას იმ დროიდან ვიცნობ, როცა 19 წლის ვიყავი. ძალიან მიჭირს ამაზე ლაპარაკი. ყველაფერი თეთრი და შავი გეჩვენება, სანამ "ცუდი ტიპი" ის ადამიანი არ აღმოჩნდება, ვინც გიყვარს. მისმინეთ: რაც მან გააკეთა, არასწორი იყო, მაგრამ ვერ ვიტყვი, რომ ის სერიულ გამაუპატიურებელ ბილ კოსბის უნდა შევადაროთ. მისი დანაშაული ახლოსაც ვერ მოვა ჰარვი ვაინშტაინის შემთხვევასთან. ლუის პათოლოგია თანხმობაზეა დაფუძნებული - ეს რა თქმა უნდა, დაუშვებელი უნდა გამხდარიყო, როგორც კი პოპულარობა მოიპოვა, თუნდაც მხოლოდ კომიკოსების საზოგადოებაში. სწორედ ეს ცვლის ყველაფერს და მიუღებლად აქცევს ქალების ჩაყენებას ამ გარემოებაში. ლუის დიდი ხანი დასჭირდა იმის გასაცნობიერებლად, რომ არასწორად მოიქცა. უბრალოდ, ისე გამოდის, რომ ვინც აღიარებს "მე ეს ჩავიდინე, ძალიან ვნანობ და მინდა გამოვასწორო", სამყაროსთვის მაშინვე კვდება, სხვები კი, ვინც უარყოფენ, უარყოფენ, უარყოფენ, რამდენი მტკიცებულებაც არ უნდა არსებობდეს, ჩვეულებრივად აგრძელენ ცხოვრებას. მე ვსაუბრობ დონალდ ტრამპზე. მე ვსაუბრობ კავანაზე [ბრეტ კავანა აშშ-ის სენატის იურიდიულმა კომიტეტმა უზენაესი მოსამართლის ვაკანტურ ადგილზე დაამტკიცა იმის მიუხედავად, რომ მას სამი ქალი სექსუალურ შევიწროებასა და ძალადობაში ადანაშაულებდა]".

ინტერვიუში სარამ ასევე აღნიშნა, რომ მას სჯერა ლუის სინანულის და სჯერა, რომ ის დაბრუნებას მოახერხებს: "მე უბრალოდ მინდა, რომ ამ ყველაფერზე სცენიდან ისაუბრობს, მაგრამ კომიკოსებს მითითებები არ უყვართ, ასე რომ, ის მაინც იპოვის საკუთარ გზას ან ვერ იპოვის და ხალხი მას უყურებს, ან არ უყურებს".

სტერნის შოუს ერთ-ერთი ქალი გამოეხმაურა, რომელმაც ლუი სექსუალურ შევიწროებაში დაადანაშაულა.

"სიმართლე რომ ვთქვა, სი ქეის ჩემთვისაც "არაფერი ჰქონდა შემოსათავაზებელი". მეც მისი თანასწორი ვიყავი სცენაზე იმ დღეს, როცა ჩემი სექსუალურად შევიწროება გადაწყვიტა. მან წამართვა დღე, რომლისთვისაც წლების განმავლობაში ვშრომობდი და ჯერაც არაფერს ნანობს. ის უბრალოდ მტაცებელია, რომელიც ქალებს ათწლეულების განმავლობაში იყენებდა და ამის შესახებ იტყუებოდა", - დაწერა რებეკა კორიმ ტვიტერზე.

სარა სილვერმანმა კორის ბოდიშით უპასუხა: "რებეკა, ვწუხვარ. ზუსტად ამიტომ არ მინდოდა, ამაში ჩავრთულიყავი. ჩემს შოუზე პრესასთან საუბარი უკვე წარმოუდგენელია ისე, რომ ამ თემაზე კითხვა არ დამისვან. შენ მართალი ხარ: თქვენ თანასწორები იყავით და ის ძალიან ცუდად მოგექცა, რაც არასწორია. ბოდიში, მეგობარო. შენ ძალიან ნიჭიერი და კეთილი ხარ".