უნიკალური შანსი იმ ადამიანებისთვის, ვინც ჯულია რობერტსისა და საკულტო რომანტიკული კომედიის, ლამაზმანის დიდი გულშემატკივარია.

გსურთ ერთი არაჩვეულებრივი დღე გაატაროთ ამერიკის ყველაზე საყვარელ მსახიობთან? მასთან ერთად ისადილოთ და შემდეგ თავად ჯულია გაგიძღვეთ ექსკურსიაზე როდეო დრაივზე, სადაც ლამაზმანმა კაბები იყიდა?

იმისათვის, რომ ჯულიასთან ერთი დღე გაატაროთ, საჭიროა სკოლებში ბულინგის აღმოსაფხვრელი კამპანიისთვის თანხა გაიღოთ, შემდეგ კი ლატარეაში გაიმარჯვოთ.

ინფორმაცია ამ დიდებული ამბის შესახებ საკუთარ ინსტაგრამზე თავად მსახიობმა დააანონსა.

იმ შემთხვევაშიც კი, თუ გამარჯვებული ვერ გახდებით, მთავარია ის საქმე, რომელსაც გაღებული თანხა მოხმარდება - ორგანიზაცია GLSEN-ის თანამშრომლებს სურთ, რომ სკოლის გარემო ერთნაირად უსაფრთხო იყოს ყველასთვის, მიუხედავად მათი რასის, გენდერისა და სექსუალური ორიენტაციისა.

ასე, რომ ამ კარგი მიზეზისთვის (თანაც თუ სავარაუდო ბონუსს გავითვალისწინებთ) თანხის გაღება ნამდვილად ღირს.