ჩინეთის სამხრეთ-დასავლეთში არსებული ქალაქი ჩენდუ ლამპიონების ხელოვნური მთვარით ჩანაცვლებას გეგმავს, რომელიც ბუნებრივ მთვარეზე უფრო კაშკაშა იქნება.

ჩენდუს კოსმოსური მეცნიერებებისა და ტექნოლოგიის სისტემების კვლევის ინსტიტუტის ხელმძღვანელი აცხადებს, რომ ისინი სატელიტის გაშვებას 2020 წლისთვის გეგმავენ.

სატელიტი 80 კილომეტრის დიამეტრის ტერიტორიის განათებას შეძლებს, ხელოვნური სინათლის დონე კი დაახლოებით ბინდისას არსებულს გაუტოლდება.

ჩინელმა მეცნიერებმა აღნიშნულ სატელიტზე მუშაობა ერთი წლის წინ დაიწყეს და მათი თქმით, უკვე საკმაო პროგრესსაც მიაღწიეს.

დაზუსტებით რთულია თქმა, მართლა გაბრწყინდება თუ არა ჩენდუს ცაზე ხელოვნური მთვარე, თუმცა მსგავსი ამბიციური იდეები მეცნიერებაში ახალი არ არის.

2013 წელს ნორვეგიის ერთ-ერთი ქალაქის თავზე სამი დიდი ელექტრონულად კონტროლირებადი სარკე დამონტაჟდა, რომელიც ქალაქის მთავარ მოედანს მზის სინათლით ანათებდა.

ფოტო: Profimedia

1990-იან წლებში კი რუსმა ასტრონომებმა და ინჟინრებმა ორბიტაზე სატელიტი გაუშვეს, რომელიც მზის სინათლეს დედამიწის ჩაბნელებული მხარისკენ ირეკლავდა. არეკლილი სინათლე საკმაოდ სუსტი იყო, თუმცა დიზაინი მუშაობდა.

ფოტო: QSI / MIR

ამ ინფორმაციამ ცხოველთა დამცველების დიდი ნაწილი შეაშფოთა, მათი თქმით ხელოვნური სინათლე ღამის ცხოველებს საფრთხეს შეუქმნის.

ხარბინის კოსმოსური სივრცის, ოპტიკისა და ტექნოლოგიის ინსტიტუტის დირექტორმა განაცხადა, რომ სატელიტის მიერ არეკლილი სინათლე ზედმეტად სუსტი იქნება იმისთვის, რომ ცხოველებს ცირკადული რითმები დაურღვიოს.