ერთი კვირის წინ ამერიკაში პირველი ავტომატიზირებული ფერმა გაიხსნა. კომპანია იმედოვნებს, რომ სოფლის მეურნეობის ინდუსტრიაში ხელოვნური ინტელექტისა და ჭკვიანი რობოტების ინტეგრაციით ისინი მუშახელის ნაკლებობის და დედამიწაზე არასაკმარისი საკვების პრობლემას აღმოფხვრიან.

კომპანიის თქმით ხელოვნური ინტელექტით აღჭურვილ ფერმას ტრადიციულთან შედარებით 30-ჯერ უფრო მეტი პროდუქციის წარმოება შეუძლია.

მაღალტექნოლოგიური ფერმა მიმზიდველი აღმოჩნდა ინვესტორებისთვისაც, მხოლოდ 2017 წელს კომპანიამ ინვესტიციების სახით 10 მილიარდი დოლარი მიიღო.

ფერმა 185 კვადრატულ მეტრს იკავებს, მცენარეები კი ინდივიდუალურ ქოთნებშია დარგული, რომლებიც რამდენიმე მეტრიან სპეციალურ ზრდის მოდულებშია ჩაწყობილი, თითოეული ასეთი მოდული 362 კილოგრამს იწონის.

ფერმაში მცენარეებზე დაკვირვებას, მათ დარგვასა და ზრდის მოდულების საჭიროებისამებრ გადაადგილებას სწორედ რობოტები ახორციელებენ.

Angus ფერმაში "მომუშავე" ერთ-ერთი რობოტია, კომპანიის დამფუძნებლის თქმით ის გამორჩეულად ჭკვიანია, ის თითქმის ნახევარ ტონიანი მანქანაა, რომელიც დამოუკიდებლად გადაადგილდება და ფერმაში სხვადასხვა სამუშაოს ასრულებს. მისი ერთ-ერთი საქმე მცენარეების, დამკრეფ რობოტამდე მიტანაა.

ფოტო: Iron Ox

დამკრეფი რობოტები განსაკუთრებული სინაზით და დელიკატური მოძრაობებით გამოირჩევიან, რათა მცენარე არ დააზიანონ. დამკრეფ რობოტს რამდენიმე სხვადასხვა ტიპის სენსორი აქვს, რომლის საშუალებითაც მას სამგანზომილებიანი მხედველობა აქვს - მას შეუძლია დაავადებული ან დაზიანებული მცენარეები ამოიცნოს.

კომპანიის დამფუძნებლის თქმით რობოტების შექმნას მრავალი წელი დასჭირდა, ის ასევე აღნიშნავს, რომ ეს რობოტები ტრადიციულ ფერმაში არსებულ დამკრეფ კომბაინებთან და სხვა მექანიზებულ დანადგარებთან არ უნდა გავაიგივოთ, რადგან მათ მუშაობის პროცესში ზუსტი და დელიკატური მოძრაობები არ სჭირდებათ.

რობოტებს ხელოვნური ინტელექტით აღჭურვილი კომპიუტერი აკონტროლებს. კომპიუტერს კი მეთვალყურეობას მეცნიერები და ფერმერები უწევენ.

ფერმაში ადამიანები სხვა წვრილმან სამუშაოსაც ასრულებენ, მაგალითად ასუფთავებენ და ფუთავენ პროდუქციას.

კომპანიის დამფუძნებლები დარწმუნებულნი არიან, რომ ავტომატიზირებული ფერმებით ინდუსტრიაში არსებული გარკვეული პრობლემების გადაჭრას შეძლებენ.