"სისხლის მაღალი წნევა. შფოთვა. დეპრესია. უძილობა"

ეს იმ დაავადებების მცირე ჩამონათვალია, რომელიც ქალების ჯანმრთელობას სექსუალური შევიწროებისა და ძალადობის შემდეგ ზიანს აყენებს. ამის შესახებ ჟურნალ JAMA Internal Medicine გამოქვეყნებულ კვლევაში ვკითხულობთ.

"ძალადობის ყველა მსხვერპლს არ სურს, რომ მომხდარი აღიაროს, თუმცა ამ შემთხვევაში ისტორიას სხეული ყვება. ის გადატანილი ტრავმის გასამხელად გზას მაინც პოულობს", - ამბობს ჰარვარდის პროფესორი და კვლევის ერთ-ერთი ავტორი ნენსი კრიგერი.

კვლევაში მონაწილეობა 40-დან 60 წლამდე 304-მა არამწეველმა ქალმა მიიღო. 19-მა პროცენტმა თქვა, რომ სექსუალური შევიწროების მსხვერპლი იყო. 22%-მა თქვა, რომ სექსუალური ძალადობა ჰქონდა გამოცდილი. გამოკითხულთა 10 პროცენტის მიხედვით, კი მათ ორივე სახის ტრავმა აქვთ გამოცდილი.

კვლევის ხელმძღვანელის, რებეკა სარსტონის მიხედვით, იმ ქალებს, რომლებმაც კვლევაში თქვეს, რომ სექსუალური ძალადობის მსხვერპლნი გახდნენ, დეპრესიის სამჯერ მაღალი რისკი აქვთ და შფოთვის ორჯერ უფრო მაღალი მაჩვენებელი, ვიდრე იმ ქალებს, რომლებსაც სექსუალური ტრავმა არ გადაუტანიათ. მათ, ვინც გამოსცადეს შევიწროება ან ძალადობა, უძილობის ორჯერ მაღალი მაჩვენებელი აქვთ.

იმ ქალებს, რომლებმაც სექსუალური შევიწროება სამსახურში გამოსცადეს, უფრო მაღალი სისხლის წნევა ჰქონდათ, ვიდრე იმ ქალებს, ვისაც ეს არ გამოუცდია. ამ სიმპტომით, ისინი ანევრიზმის, ინფარქტის, თირკმლის დაავადების, გულის შეტევის და გულის სხვა დაავადებების მაღალი რისკის ქვეშ ხვდებოდნენ.

სექსუალურ შევიწროებასთანაა ასევე დაკავშირებული სისხლში ტრიგლიცერიდის არსებობის ზღვარი, რომლის ზრდაც გულის დაავადების მთავარი რისკ-ფაქტორია. ამერიკაში ქალთა სიკვდილიანობის მთავარ მიზეზად სწორედ გულის დაავადებებია მიჩნეული.

კვლევის ავტორის თქმით, იმ ქალების ჯანმრთელობის გაუარესების მაჩვენებლები განსაკუთრებით საგანგაშოა, რომლებმაც სექსუალური სახის ძალადობა სამსახურში გამოსცადეს:

"არსებობდა განსხვავებები იმ ქალების ჯანმრთელობის მდგომარეობებს შორის, რომლებიც შეავიწროვეს და იძალადეს. ეს ხაზს უსვამს ამ გამოცდილებებს შორის არსებულ განსხვავებებს".

ამერიკის დაავადებათა კონტროლისა და ცენტრის ცნობით, ყოველ სამ ქალში მინიმუმ ერთს სექსუალური ძალადობა გამოუცდია. ქალების 75%-ზე მეტს კი სექსუალური შევიწროება გამოუცდია სამსახურში.

კვლევის ავტორები სექსუალური ტრავმის არსებობის შემთხვევაში ქალებს საჭირო სამედიცინო დახმარების მიღებისკენ მოუწოდებენ.