პარიზში წითელი, ღია და ეკომეგობრული საჯარო პისუარები დაამონტაჟეს, რათა ქალაქის სისუფთავე იმ გამვლელებისგან დაეცვათ, რომლებიც ქუჩებში შარდავდნენ.

ერთი შეხედვით, ქუჩაში განლაგებული ტუალეტები სასარგებლო მიზანს ემსახურებიან, თუმცა მოსახლეობა უკმაყოფილოა. ისინი ამბობენ, რომ პისუარები საფრანგეთის დედაქალაქის იერსახეს ამახინჯებენ.

განრისხებული მოქალაქეები ქალაქის მთავრობისგან მათ მოხსნას მოითხოვენ და პეტიციის შედგენასაც გეგმავენ, რომ მომხრეთა რაოდენობა კარგად წარმოაჩინონ.

ერთ-ერთი პისუარი პარიზის ღვთისმშობლის ტაძრის სიახლოვესაა და მისი დანახვა შესაძლებელია ტურისტებით სავსე გემიდან.

ფოტო: AFP

"ასეთ ისტორიულ ადგილზე ამ უშნო მოწყობილობის დადგმა საჭირო არ იყო. გვითხრეს, რომ ეს ცვლილება ქალაქისთვის აუცილებელი იყო, მაგრამ ჩვენ მის მიღებას არ ვაპირებთ", - ამბობს უკმაყოფილო მოქალაქე.

ჯერჯერობით, ადგილობრივი ხელისუფლება ქუჩებიდან საჯარო ტუალეტების აღებას არ აპირებს, თუმცა, შესაძლოა მათ ადგილები შეუცვალონ.