Billionaire Boys Club ამერიკის 11 კინოთეატრში პარასკევს, 17 აგვისტოს გამოვიდა და პირველ დღეს 126 დოლარი გამოიმუშავა. გამოსვლიდან 3 დღეში, ფილმის შემოსავალი $618-ს შეადგენს.

2018 წელს, კინოთეატრებში ბილეთის საშუალო ფასი 9,27 დოლარია. ამ მონაცემებით, თითო კინოთეატრში ფილმზე, სამი დღის განმავლობაში, საშუალოდ 6 ადამიანი მივიდა.

Billionaire Boys Club მანამ გადაიღეს, სანამ სპეისის სექსუალურ შევიწროებაში დაადანაშაულებდნენ. ფილმის სიუჟეტი 1980-იანი წლების ლოს-ანჯელესში ვითარდება.

შეგახსენებთ, რომ გასულ წელს კევინ სპეისი ენტონი რაპმა სექსუალურ შევიწროებაში დაადანაშაულა. სკანდალის შემდეგ ის გაათავისუფლეს Netflix-ის სერიალიდან House of Cards, რომელშიც მთავარ როლს ასრულებდა. ამავდროულად საერთაშორისო სატელევიზიო აკადემიამ გააუქმა დაგეგმილი ღონისძიება, რომელზეც კევინ სპეისის საპატიო ემის გადასცემდნენ.

გარდა ამისა, რიდლი სკოტის ახალი ფილმიდან All the Money in the World, კევინ სპეისის მიერ შესრულებულ ყველა სცენა ამოჭრეს.

ამერიკის ყველაზე გავლენიანმა სააგენტომ, CAA კევინ სპეისის კონტრაქტი შეუწყვიტა. მსახიობთან თანამშრომლობაზე უარი თქვა მისმა აგენტმაც. კევინ სპეისი მოხსნეს ონლაინ სასწავლო პროგრამების კურსიდან, MasterClass, სადაც მსახიობი სტუდენტებს ლექციებს უკითხავდა.