ნაციონალური მოძრაობის დეპუტატი, ნიკა მელია თბილისის პროკურატურაში გამოკითხვაზეა. პოლიტიკოსი უწყებაში პარლამენტთან ზაზა სარალიძის მხარდამჭერ აქციაზე მომხდარი ინციდენტის გამო დაიბარეს. ის 11 ივნისს რამდენიმე ოპოზიციონერ პოლიტიკოსთან ერთად დააკავეს.

მელიას თქმით, შს მინისტრმა გიორგი გახარიამ უნდა დაამტკიცოს ჩაიდინა თუ არა მან დანაშაული.

"წინააღმდეგ შემთხვევაში მოუწევს დასჯა ყველა იმ მაღალი თანამდებობის პირებისა, რომლებმაც უკანონოდ კონსტიტუციის ფეხქვეშ გათელვით დააკავეს პარლამენტის წევრი", - განაცხადა ნიკა მელიამ.

On.ge-ს საქართველოს პროკურატურაში განუცხადეს, რომ ნიკა მელია მოწმის სახით იკითხება. საქმეზე გამოძიება სისხლის სამართლის კოდექსის 333-ე მუხლის პირველი ნაწილით მიმდინარეობს. აღნიშნული მუხლი მოხელის ან მასთან გათანაბრებული პირის მიერ სამსახურებრივი უფლებამოსილების გადამეტებას ეხება, რამაც ფიზიკური ან იურიდიული პირის უფლების, საზოგადოებისა ან სახელმწიფოს კანონიერი ინტერესის არსებითი დარღვევა
გამოიწვია.