ეგვიპტეში საქართველოს საელჩოს ეკონომიკური მრჩევლის, გოჩა კერესელიძის განმარტებით, საქართველო ეგვიპტელ ინვესტორებს 5 პროექტის განხორციელებას თბილისში სთავაზობს. შეთავაზება გუდიაშვილის მოედნის ათვისებასაც მოიცავს, სადაც 8 სასტუმროსა და რესტორნების კომპლექსის აშენება $20 მილიონიანი ინვესტიციით იგეგმება. ინფორმაციას Daily News Egypt ავრცელებს.

როგორც ეგვიპტური გამოცემა წერს, საქართველოს საელჩო ეგვიპტელი ინვესტორებისთვის თბილისში 5 პროექტში ინვესტირებას სთავაზობს:

1. გუდიაშვილის მოედნის პროექტი დაახლოებით 10 ათას კვადრატულ მეტრ ფართს მოიცავს და მისი განვითარება 8 წლის განმავლობაში მოხდება. როგორც გამოცემა იუწყება, ამ პროექტით 18,4%-ის უკუგების ამოღებაა დაგეგმილი.
2. მეორე პროექტის განხორციელება, რომელსაც საქართველო ეგვიპტელ ინვესტორებს სთავაზობს, 700 ათას კვადრატულ მეტრ ფართზეა დაგეგმილი, რომლის ფარგლებშიც ახალი საცხოვრებელი რაიონი უნდა აშენდეს. ახალ რაიონში 5 600 ოჯახი იცხოვრებს. აღნიშნულ საცხოვრებელ სახლში კვადრატული მეტრი ფართის ფასი საშუალოდ 600 დოლარი იქნება.
3. მესამე პროექტი თბილისში საპარკინგე ადგილების მშენებლობას ეხება, რომლის შედეგადაც, ჯამში, პარკირების ადგილები 3 540-მდე გაიზრდება. ამისთვის 19 მილიონი დოლარი გამოიყოფა და პროექტის განხორციელებას 4-დან 8 წლამდე დასჭირდება, შიდა უკუგებით 11-დან 51 პროცენტამდე.
4. მეოთხე პროექტი ქუჩებში არსებული ლამპიონების ლედ-სანათებით ჩანაცვლებას ითვალისწინებს, რომლის შედეგად, ქუჩების განათებისთვის გამოყოფილი თანხა დაიზოგება, ხოლო განათება უკეთესი ხარისხის იქნება. პროექტის ფარგლებში 91 ათასი ლამპიონი ჩანაცვლდება, რაც დაახლოებით 32 მილიონი დოლარი დაჯდება, შიდა უკუგება კი 8,46 პროცენტი იქნება.
5. მეხუთე პროექტი თბილისის ზღვის განვითარებას ეხება, რომლის ტერიტორიასაც კერძო ინვესტორს ან სამართავად გადასცემენ, ან მიყიდიან. პროექტის ფარგლებში იგეგმება მასშტაბური გამწვანება, სპორტული ინფრასტრუქტურის მოწყობა, ასევე საცხოვრებელი და კომერციული ფართების აშენება.

როგორც Daily News Egypt წერს, საქართველოს საელჩო პროექტებს ეგვიპტის პრემიერმინისტრს, შერიფ ისმაილს წარუდგენს იმისთვის, რათა ინვესტორებს გაუჩნდეთ სურვილი ჩამოვიდნენ საქართველოში და თავად ნახონ ქართული საინვესტიციო შესაძლებლობები.

კერესელიძე ასევე მოუწოდებს ეგვიპტელ ინვესტორებს, რომ საქართველოს სოფლის მეურნეობის განვითარებაში დააბანდონ თანხები, რომელიც ეგვიპტის მწვანე კორიდორთან დაკავშირებულ ინტერესებს ეფუძნება.

2015 წელს რუსეთმა გადაწყვიტა მწვანე კორიდორი შექმნას ეგვიპტესთან, იორდანიასთან და თურქეთთან იმისთვის, რომ რუსეთმა ხილისა და ბოსტნეულის იმპორტი ამ ქვეყნებიდან განახორციელოს.