2018 წლის ზაფხულში ეკრანზე პოპულარული ამერიკული მიუზიკლის მამა მიას მეორე ნაწილი, Mamma Mia: Here We Go Again! გამოვა. ნაცნობი მსახიობების - მერილ სტრიპის, კოლინ ფერტის, ამანდა სეიფრიდის, პირს ბროსნანისა და სხვა ვარსკვლავების გარდა, ახალ ნაწილში მონაწილეობას ლეგენდარული მომღერალი და მსახიობი შერიც მიიღებს, რომელიც სტრიპის პერსონაჟის, დონას დედას განასახიერებს.

ფილმის მეორე ნაწილში აქცენტი სოფიზე (ამანდა სეიფრი) გაკეთდება, რომელიც ორსულად არის და ცდილობს გაიგოს, თუ როგორი იყო დედამისი ახალგაზრდობაში.

გასული რამდენიმე თვის განმავლობაში, ერთმანეთის მიყოლებით კინოსურათის ორი ტრეილერი გამოვიდა, თუმცა ფანების უკმაყოფილება გამოიწვია იმან, რომ არც ერთ მათგანში მერილ სტრიპის პერსონაჟი დონა არ ჩანს.

სწორედ ამიტომ ფანები შიშობენ, რომ Mamma Mia-ს მეორე ნაწილში, მერილ სტრიპის პერსონაჟი მკვდარია. ამას დაემატა ისიც, რომ მასზე საუბრისას გამუდმებით წარსულს იხსენებენ.

ახლახან ფილმის ფინალური ტრეილერი გამოვიდა, სადაც მერილ სტრიპის პერსონაჟი, დონა ჩანს, თუმცა არავინ იცის ის ფილმში ცოცხალია თუ მხოლოდ მოგონების სახით გამოჩნდება რამდენიმე ეპიზოდში.