13 წლის ამერიკელი ბიჭი, ალაბამიდან, გონებაზე მას შემდეგ მოვიდა, რაც მშობლებმა მისი ორგანოების გაცემაზე თანხმობას ხელი მოაწერეს.

ტრენტონ მაკინლი მარტში მანქანიდან გადმოვარდა, თავი დაარტყა და ტვინის მრავალჯერადი ტრავმა მიიღო. ექიმებმა ოჯახის წევრებს უთხრეს, რომ ის ვერ გამოჯანმრთელდებოდა, მისი ორგანოები კი ხუთ ბავშვს შეუნარჩუნებდა სიცოცხლეს.

ტრენტონს სიცოცხლეს სუნთქვის აპარატი უნარჩუნებდა, რომლის გამოყენების ვადაც იწურებოდა. თუმცა, გამორთვამდე ერთი დღით ადრე, 13 წლის ბიჭი გონებაზე მოვიდა.

თინეიჯერს თავის ქალის შვიდი მოტეხილობა ჰქონდა, მას რამდენიმე ოპერაცია ჩაუტარდა, თუმცა სხვა ტრავმებთან ერთად, მისმა თირკმელმა ფუნქციონირება შეწყვიტა და გული რამდენჯერმე გაუჩერდა.

ტრენტონის დედის თქმით, ექიმებმა უთხრეს, რომ ის საოპერაციო მაგიდაზე "15 წუთის განმავლობაში მკვდარი იყო", თუმცა მისმა სხეულმა სიცოცხლე განაგრძო. ამის მიუხედავად, ექიმების თქმით, ის აღარასდროს მოვიდოდა გონებაზე.

ამის შემდეგ, მშობლებს აცნობეს, რომ მათი შვილი ორგანოებს გადანერგვის შემთხვევაში ხუთი ბავშვის სიცოცხლეს იხსნიდა, რის შემდეგაც, ისინი ორგანოების გაცემას დათანხმდნენ.

"ეს რაღაც მხრივ ჩვენს შვილს ცოცხალს დატოვებდა", - ამბობდნენ მშობლები.

მომდევნო დღეს ტრენტონს ტვინის ფინალური ტესტი უნდა ჩატარებოდა, რათა ექიმებს მისი სიკვდილის დრო დაეფიქსირებინათ, თუმცა ბიჭი გონებაზე მოვიდა. ახლა ის გამოჯანმრთელების გრძელ გზას გადის.

"ბეტონზე დავეცი და შემდეგ სატვირთოს უკანა ნაწილი თავზე დამეცა. ამის შემდეგ არაფერი მახსოვს", - ამბობს თინეიჯერი, რომელიც უკვე დადის, ლაპარაკობს, კალათბურთის ბურთს ისვრის და მათემატიკის სავარჯიშოებს აკეთებს. მას ჯერ კიდევ აქვს ნერვული ტკივილი და თავის ქალის კიდევ ერთი ოპერაცია სჭირდება.

ბიჭის თქმით, სანამ კომაში იყო, თავს სამოთხეში გრძნობდა.

"ღია მდელოზე ვიყავი და სულ წინ მივდიოდი", - იხსენებს ის.

ბიჭის გამოჯანმრთელებას სასწაულს უკავშირებენ და მას უკვე "სასწაულებრივად გადარჩენილი ბიჭი" შეარქვეს. ოჯახი სამედიცინო ხარჯების დასაფარად, ფეისბუქზე საქველმოქმედო კამპანიას მართავს.