წელს კანის საკონკურსო პროგრამაში ნეტფლიქსის არც ერთი ფილმი არ მიიღებს მონაწილეობას. მიზეზი კი მხოლოდ ის იყო, რომ ამ ფილმების ჩვენებები კინოთეატრში არ მოხდებოდა და მაყურებელი მას მხოლოდ ლეპტოპისა თუ სმარტფონის ეკრანზე ნახავდა.

სწორედ ამიტომ, კანის კინოფესტივალის თავმჯდომარის, ტიერი ფრემოს გადაწყვეტილებით ნეტფლიქსის არც ერთი ფილმი საკონკურსო პროგრამაში არ მიიღებს მონაწილეობას.ფრემომ განმარტა, რომ მათი მოთხოვნით აუცილებელია, რომ ფესტივალის საკონკურსო ფილმები მოგვიანებით კინოთეატრშიც გაუშვან, ამ პოზიციას კი ნეტფლიქსი არ იზიარებს.

სწორედ ამიტომ, შესაძლოა, ნეტფლიქსმა შურისძიება გადაწყვიტა და კანის საკონკურსო ფილმებზე დისტრიბუციის უფლების შეძენას აპირებს.

გასულ კვირას ცნობილი გახდა, რომ ნეტფლიქსმა ჟან-ლუკ გოდარის ახალი ფილმის, The Picture Book, უფლებები შეიძინა. ამ ამბავმა კი ყველაზე მეტად ფილმის პროდიუსერი, ვინსენტ მორავალი გაახარა და თქვა, რომ ეს მისი ოცნება იყო.

"ფილმის პრემიერა კანში შედგება, 10 დღის შემდეგ კი მას ნეტფლიქსის წარმომადგენლები იყიდიან და ფილმის დისტრიბუციის სრული უფლებაც მათ გადაეცემათ. ფილმი გავა როგორც საფრანგეთის, ისე მსოფლიოს სხვა ქვეყნის კინოთეატრებშიც", - ამბობს მორავალი.

უკვე დღეს კი ცნობილი გახდა, რომ ნეტფლიქსი კანის საკონკურსო პროგრამაში წარდგენილი ფილმების პროდიუსერებს დაუკავშირდა და მათ დისტრიბუციის უფლების მათთვის მიყიდვა შესთავაზა.