ჯოან როულინგი ტრადიციას არ არღვევს და ჰოგვორტსის ომის 20 წლისთავზე ბოდიშს იხდის კიდევ ერთი პერსონაჟის გამო, რომელიც მის კალამს ემსხვერპლა. ამჯერად პოტერიადას ყველაზე მზრუნველი და კეთილი გმირის, დობის ჯერი დადგა.

დარწმუნებული ვართ, დობი ყველას გახსოვთ. თუ ვინმეს დაგავიწყდათ, მაშინ ჭეშმარიტი პოტერჰედი არ ხართ. პატარა, შინაურმა ელფმა პოტერიადაში უდიდესი როლი ითამაშა და არაერთხელ იხსნა მთავარი გმირები სიკვდილისგან.

დობი პოტერიადაში პირველად საიდუმლო ოთახის წიგნში გამოჩნდა, როდესაც ჰარი პოტერის გადასარჩენად საკუთარი უფროსების ნებას დაუპირისპირდა, რაც შინაური ელფისთვის წარმოუდგენელი სიმამაცე იყო. საბოლოოდ, ის ჰარისა და მისი მეგობრების გადარჩენას ემსხვერპლა, ეს ემოციური სცენა პოტერჰედებს არასდროს დაავიწყდებათ. ამ დროს ყველა ჩვენგანი ერთხმად ტიროდა.

"წელს ბოდიშს ვიხდი, რომ მოვკალი პერსონაჟი, რომელიც ჰოგვორტსის ბრძოლას არ შეწირვია. ამ პერსონაჟმა გასწირა სიცოცხლე იმისთვის, რომ გადაერჩინა ჯადოქრები, რომლებმაც ეს ომი მოიგეს. რა თქმა უნდა, შინაურ ელფს, დობის ვგულისხმობ", - დაპოსტა როულინგმა ტვიტერზე.

კომენტარებში პოტერჰედები წერენ, რომ დობის სიკდვილი ძალიან განიცადეს. ზოგიერთი ამბობს, რომ როულინგს მაინც ვერ აპატიებს დობის სიკვდილს, რადგანაც ასეთი კეთილი პერსონაჟის არსებობა ჯადოსნურ სამყაროში ძალიან მნიშვნელოვანი იყო.

როულინგის სამყაროში ჰოგვორტსის ომი 1998 წლის 2 მაისს გაიმართა. ეს ომი გადამწყვეტი ბრძოლა იყო სიკეთესა და ბოროტებას შორის, თუმცა ბნელი ლორდის დამარცხებას ფენიქსის ორდენის და დაბმლდორის არმიის არა ერთი წევრი ემსხვერპლა.

მწერალმა წიგნის გამოსვლიდან რამდენიმე წლის შემდეგ აღნიშნა, რომ დღემდე ნანობს საყვარელი პერსონაჟების სიკვდილს. სწორედ ამიტომ, 2 მაისს როულინგი პოტერჰედებს ბოდიშს უხდის პერსონაჟების გარდაცვალების გამო. თავდაპირველად მან სევერუს სნეიპის, ფრედ უიზლის და რემუს ლუპინის სიკვდილის გამო მოიბოდიშა.