რაშმორის მთაზე გამოკვეთილი პრეზიდენტები, აღდგომის კუნძულის ქანდაკებები, ლინკოლნის ძეგლი ვაშინგტონში - ეს ქანდაკებები წლებია არსებობენ და, ალბათ, კიდევ უამრავი წელი იარსებებენ. სწორედ ეს სხვაობა იქნება ამ ძეგლებსა და აისბერგზე ამოკვეთილ ტრამპის სახეს შორის.

ფინელ კლიმატისტთა ჯგუფი პრეზიდენტ ტრამპის სახის აისბერგზე ამოსაკვეთად თანხას აგროვებს. ეკოლოგები აპირებენ, ამით გააპროტესტონ მისი ანტიმეცნიერული პოლიტიკა და გლობალური დათბობის თვალსაჩინო მტკიცებულება შექმნან. პროექტს ირონიულად პროექტი ტრამპმორი დაერქვა. ნაწილობრივ, ეს პროექტი რესპუბლიკელი ჯეიმს ინჰოფის სენატში გამოსვლის პასუხიცაა. პოლიტიკოსმა იმის დასამტკიცებლად, რომ გლობალური დათბობა მითია, სენატში თოვლის გუნდა შეიტანა. პასუხი სამეცნიერო თვალსაზრისით ამ გამოსვლის მსგავსი "კალიბრისაა", თუმცა მათი ზომები ნამდვილად განსხვავდება ერთმანეთისგან. ტრამპის მომავალი ქანდაკება 35 მეტრი სიმაღლის იქნება და მასზე დაკვირვება ყველას შეგვეძლება ონლაინ რეჟიმში.

ეს იდეა ნაწილობრივ ტრამპის დამსახურებაცაა, რომელმაც ერთ-ერთ გამოსვლაზე იხუმრა, რომ ოდესმე მისი სახეც იქნებოდა რაშმორის მთაზე. პროექტ ტრამპმორის ავტორები კი ტრამპის სურვილის ოდნავ განსხვავებულად ასრულებენ.

MIA-ის (Melting Ice Association) თავჯდომარე ნიკოლას პრიეტოს თქმით, ზოგჯერ ადამიანებს მხოლოდ იმის სჯერათ, რასაც საკუთარი თვალებით ხედავენ, ტრამპის სახის უზარმაზარი ქანდაკების ონლაინ რეჟიმში დნობას კი, ცხადია, უამრავი ადამიანი ნახავს.