კომუნიკაციების ჟურნალში გამოქვეყნებული ახალი კვლევა გვიჩვენებს, რამდენად ხშირად და რასთან დაკავშირებით იტყუებიან ონლაინ გაცნობის სერვისების მომხმარებლები. კვლევა სტენფორდის ჰუმანიტარული და საბუნებისმეტყველო მეცნიერებების სკოლის პროფესორმა ჯეფრი ჰენკოკმა და სტენფორდის სოციალური მედიის ლაბორატორიის ყოფილმა თანამშრომელმა, დევიდ მარკოვიცმა ჩაატარეს. იმის დასადგენად, თუ რამდენად გულწრფელები არიან ონლაინ სიყვარულისა თუ სექსის მაძიებლები, გამოკითხვაში მონაწილეობა 200-ზე მეტმა მოხალისემ მიიღო, მკვლევარებმა კი 3000-ზე მეტი შეტყობინება გააანალიზეს. ეს შეტყობინებები მომხმარებლებს შორის "აღმოჩენის ფაზის" (პირველი მიმოწერიდან პირისპირ შეხვედრამდე) დროს იყო გაგზავნილი. ეს ის პერიოდია, როდესაც ცდილობ, გაარკვიო, რამდენად "კარგი ტიპია" შენი პოტენციური პარტნიორი, აქვს თუ არა ნანახი შენი საყვარელი ფილმი და კატა უფრო უყვარს, თუ ძაღლი.

კარგი ამბები ასეთია, გამოკითხულთა 2/3 ამბობს, რომ ერთი ტყუილიც კი არ უთქვამს. ხოლო, შეტყობინებათა მხოლოდ 7% შეფასდა, როგორც მაცდური, მათი უმეტესობა კი პატარა უმნიშვნელო ტყუილები იყო. სულაც არაა გასაკვირი, რომ ტყუილების უმეტესობა ტრაბახის მიზნით ითქვა, თითქოს უფრო გამხდარი ხარ, ან უფრო მაღალი, ვიდრე სინამდვილეში. ტყუილების 1/3 კი შეფასდა, როგორც "კეთილი ტყუილები", ეს ისეთი ტყუილები იყო, რომელთა მეშვეობითაც მომხმარებელი ცდილობდა ურთიერთობის გაწყვეტას, ან შემოთავაზებაზე უარის თქმას ისე, რომ მეორე მხარისათვის გული არ ეტკინა.

ცხადია, ამ კვლევას თავისი სისუსტეები აქვს. მაგალითად ის, რომ გამოკითხვის ავთენტურობა მოხალისეების გულწრფელობაზე იყო დამოკიდებული. მონაწილეებს თავად უნდა გაემხილათ, მართალი იყო თუ არა მათ მიერ გაგზავნილი ესა თუ ის შეტყობინება. თუმცა, ამ პროგრამის მომხმარებელთა საბოლოო შეფასება დადებითია. მარკოვიცის შეფასებით, იმ შეტყობინებების უმეტესობა, რომელსაც ადამიანები ერთმანეთს უგზავნიან, გულწრფელია, რაც ნამდვილად კარგი დასაწყისია მომავალი რომანტიკული ურთიერთობისათვის.

1 მაისს Facebook-მა გამოაცხადა, რომ მარტოხელა მომხმარებლებს სიყვარულის პოვნაში დაეხმარება, რისთვისაც გაცნობის სერვისს შექმნის.