ილიაუნიში, ილიას სახელმწიფო უნივერსიტეტთან არსებული კონსტიტუციური კვლევების ცენტრისა და სოციალური კვლევების ლაბორატორიის ორგანიზებით კონფერენცია გაიმართა, თემაზე: „ნაფიც მსაჯულთა სასამართლო რეფორმა საქართველოში“.

კონფერენცია შოთა რუსთაველის ეროვნული სამეცნიერო ფონდის მიერ 2017 წელს დაფინანსებული პროექტის ფარგლებში ჩატარდა. პროექტი 3-წლიანია და ამ ხნის განმავლობაში რამდენიმე კონფერენციისა და სემინარის გამართვა იგეგმება. აღნიშნული კონფერენცია პროექტის ფარგლებში პირველი იყო.

კონფერენციაზე მომხსენებლებმა პროექტის შესახებ პრეზენტაცია ჩაატარეს და დამსწრე აუდიტორიას ამ ეტაპისთვის ჩატარებული კვლევის წინასწარი შედეგები გააცნეს.

ფოტო: დიმიტრი სანაია

ფოტო: ილიას სახელმწიფო უნივერსიტეტი

მომხსენებლებმა აღნიშნეს, რომ ნაფიც მსაჯულთა სასამართლო რეფორმა საქართველოს სასამართლო სისტემის განვითარებისთვის ძალიან მნიშვნელოვანია, რადგან ის ზრდის სისტემის მიმართ ნდობას და მოქალაქეობრივ პასუხისმგებლობას.

ილიას სახელმწიფო უნივერსიტეტის სამართლის სკოლის კონსტიტუციური კვლევების ცენტრის მკვლევარმა, გიორგი მელაძემ განაცხადა, რომ ეს პროექტი ხელს შეუწყობს მართლმსაჯულების სისტემის გაძლიერებასა და მოქალაქეების ცნობიერების ამაღლებას.

"თუკი საზოგადოებას ექნება ინფორმაცია ნაფიც მსაჯულთა ინსტიტუტის შესახებ, უფრო მეტად გაითავისებს პასუხისმგებლობას, გაიაზრებს რომ თავად მართავს ქვეყანას და ჩართულია ყველა პროცესში, რომელიც ქვეყანაში ხდება, მათ შორის სასამართლო სისტემაში", - ამბობს გიორგი მუმლაძე.

ფოტო: დიმიტრი სანაია

ფოტო: დიმიტრი სანაია

კონფერენციას ესწრებოდა საქართველოს მთავარი პროკურატურის სამმართველოს პროკურორი ზაზა დათუკაშვილი, რომელმაც ნაფიც მსაჯულთა ინსტიტუტის განვითარების მნიშვნელობაზე ისაუბრა.

"ნაფიც მსაჯულთა ინსტიტუტი არის ახალი ინსტიტუტი საქართველოში, ის 2010 წელს შევიდა ძალაში, თუმცა განსაკუთრებით ბოლო რამდენიმე წლის განმავლობაში ამოქმედდა. შესაბამისად, ძალიან მნიშვნელოვანია, რომ მოხდეს საზოგადოების ცნობიერების ამაღლება, თუ რას ნიშნავს ნაფიც მსაჯულთა ინსტიტუტი, რას ემსახურება ის, ვინაიდან საზოგადოება კიდევ უფრო აქტიურად ჩაერთოს აღნიშნულ პროცესში", - ამბობს ზაზა დათუკაშვილი.

ფოტო: დიმიტრი სანაია

კონფერენციის ფარგლებში სიტყვით გამოვიდა კანადის ვილფრედ ლორიელის უნივერსიტეტის ასოცირებული პროფესორი ნიკოლაი კოვალევი, რომელმაც ნაფიც მსაჯულთა სასამართლოს რეფორმის აუცილებლობაზე ისაუბრა. მისი თქმით, ეს ინსტიტუტი არის დემოკრატიის განუყოფელი ნაწილი და მნიშვნელოვანია, რომ საზოგადოებას კარგად ჰქონდეს გააზრებული პასუხისმგებლობა.