საფრანგეთის სამხრეთ ნაწილში მდებარე პატარა ქალაქ ელნში დიდი დავიდარაბაა ატეხილი. ქალაქში მდებარე ეტიენ ტერუს მუზეუმში გამოფენილი ნახატების უმრავლესობა ყალბი აღმოჩნდა.

ქალაქის მერი შექმნილ მდგომარეობას "კატასტროფულ უბედურებას" უწოდებს.

აქამდე ითვლებოდა, რომ მუზეუმში გამოფენილი ყველა ნახატი ადგილობრივი ხელოვანის, ეტიენ ტერუს შემოქმედება იყო. მხატვარი მეცხრამეტე საუკუნის ბოლოსა და მეოცე საუკუნის დასაწყისში მოღვაწეობდა.

"ეტიენ ტერუ ელნის უდიდესი მხატვარი იყო. ის ჩვენი საზოგადოების ნაწილი და ჩვენი მხატვარი იყო. ძალიან სამწუხაროა იმის ცოდნა, რომ ხალხი მუზეუმში დადიოდა და ყალბ ნახატებს ათვალიერებდა, ეს ჩვენი მუნიციპალიტეტისთვის ნამდვილი კატასტროფაა", - ამბობს დასახლების მერი.

ხელოვნების ისტორიკოსის, ერიკ ფორკადას შეფასებით, 140 ნახატიდან 82 ნამუშევარი [კოლექციის 60%], ყალბია:

"ერთ ნახატზე მელნით დატოვებული ხელწერა მოშორდა, როცა ჩემი თეთრი ხელთათმანი გადავუსვი. სტილისტურ დონეზე ნახატი დაუმუშავებელია. წინააღმდეგ შემთხვევაში ჩემი ბამბის ხელთათმანი ტერუს ტილოს ვერაფერს დააკლებდა. ამის გარდა, სხვა შეუსაბამობებიც აღმოვაჩინეთ".

ქალაქის მერის განცხადებით, სანამ ნამდვილ ნახატებს არ აღმოაჩენენ, გამოძიება გაგრძელდება. "ჩვენ ასე არ დავნებდებით", - ამბობს ის.

ფორკადას თქმით, ტერუს ფერწერული ტილოს ფასი 15 ათასი ევრო, ხოლო ნახატებისა და წყლის საღებავებით შესრულებული ნამუშევრების ფასი 2 000 ევრო იქნებოდა.