ყოველდღიურად უამრავი ბავშვი აცდენს სკოლას, რადგან იქ, საკლასო ოთახსა თუ დერეფნებში აგრესიული თანატოლები ელოდებიან. არსებობს გარკვეული ნიშნები, რომლითაც შეგიძლიათ ამოიცნოთ, რომ თქვენი შვილი ჩაგვრის მსხვერპლია. რაც უფრო ადრე აღმოაჩენთ პრობლემას, მით მეტია შანსი, რომ ბავშვს ფსიქოლოგიურ ტრავმას აარიდებთ.

1. აუხსნელი ნაკაწრები და ჩალურჯებები

ფოტო: Shutterstock

თუ ბავშვი ხშირად ბრუნდება სახლში დალურჯებებით / ჭრილობებით და გეუბნებათ, რომ წაიქცა ან თამაშის დროს დაშავდა, დიდი შანსია, სიმართლეს ვერ გიმხელდეთ. დეტალურად გამოჰკითხეთ მას, რა სიტუაციაში მიიღო დაზიანება.

2. გაუარესებული ნიშნები

ფოტო: ISTOCK/BRIANAJACKSON

გაუარესებული ნიშნები და სწავლისადმი დაკარგული ხალისი ერთ-ერთი მთავარი საგანგაშო სიგნალია. სანამ ბავშვს სიზარმაცის გამო უსაყვედურებდეთ, გაარკვიეთ, რატომ შეიძლება უჭირდეს მას საგნებზე კონცენტრირება. შეამოწმეთ დასწრებაც, განსაკუთრებით, თუ თინეიჯერი შვილი გყავთ.

3. ცვლილებები კვებაში

თუ ამჩნევთ, რომ თქვენი შვილი ჭამაზე უარს ამბობს, ან პირიქით, სახლში დაბრუნებისთანავე ძალიან ბევრს ჭამს, შესაძლოა, ეს ცვლილებები მის ცხოვრებაში არსებულ სტრესს უკავშირდებოდეს. კიდევ ერთი ვარიანტი ისაა, რომ შესაძლოა, ბავშვს ლანჩისთვის განკუთვნილ ფულს ართმევენ, რის გამოც დღის განმავლობაში მშიერია.

4. ძილის დარღვევები

ფოტო: ISTOCK/ANDREYPOPOV

თუ ბავშვი ღელავს იმაზე, როგორი იქნება შემდეგი დღე სკოლაში, დიდი შანსია, ამის გამო დაძინება უჭირდეს ან კოშმარებით იტანჯებოდეს. ბორგვა, წრიალი, ხშირი გამოღვიძება - ეს ყველაფერი თქვენი შვილის ცხოვრებაში არსებულ პრობლემაზე მიუთითებს.

5. მსხვერპლის პოზიცია

ფოტო: ISTOCK/CRAIG DINGLE

თავჩაქინდრული სიარული, წელში მოხრილი ჯდომა - ეს მსხვერპლის გარეგნული ნიშნებია. ბავშვები, რომლებიც სისტემატურად განიცდიან ბულინგს, დროთა განმავლობაში უფრო და უფრო იკეტებიან საკუთარ თავში და აზრის გამოთქმისგან თავს იკავებენ. ფსიქოლოგები მშობლებს ურჩევენ, ასეთ დროს ბავშვი შეიყვანონ სპორტზე/წრეზე, სადაც კონკურენტები არ ეყოლებათ და მხოლოდ საკუთარ თავს შეეჯიბრებიან. ასეთია მაგალითად ძიუდო, კლდეზე ცოცვა და ასე შემდეგ. ამ გზით ბავშვს თვითშეფასების აღდგენა სხვებთან დაპირისპირების გარეშე შეეძლება.