ქართული ალტერნატიული როკჯგუფი ლაუდსფიქერსი მეორე ალბომზე მუშაობს, რომელიც ლევან ლაუდაძის სიტყვებით "წინასგან განსხვავებული ჟღერადობის" იქნება.

როგორც ჯგუფის ვოკალისტმა საზოგადოებრივი მაუწყებლის გადაცემა აკუსტიკაში თქვა, მეორე ალბომზე მუშაობა დაწყებულია, თუმცა ახალი სიმღერები ჯერ სტუდიაში არ ჩაწერილა.

ალბომის გამოსვლის თარიღზე, მის სახელზე ან ახალი სიმღერების რაოდენობაზე ინფორმაცია არ გაჟღერებულა, თუმცა ჯგუფმა გადაცემისთვის ახალი სიმღერა, I Don't Blame You [არ გადანაშაულებ] შეასრულა. ტექსტის ავტორი ლევან ლაუდაძეა, მუსიკა კი ჯგუფს ეკუთვნის.

"ეს სიმღერა პასუხისმგებლობებზეა. ჩემი რჩევაა საკუთარი თავის და ყველას მიმართ, რომ იმ დონის პასუხისმგებლობები ავიღოთ, რასაც საბოლოოდ თავს გავართმევთ. I Don't Blame You - არ გადანაშაულებ, იმიტომ, რომ რამდენადაც ძლიერები ვართ, იმდენად სუსტები ვართ", - თქვა ვოკალისტმა სიმღერის შინაარსზე საუბრისას.

LOUDspeakers-მა პირველი ალბომი Lighthouse 2015 წელს გამოუშვა. ჯგუფი ალტერნატიულ და ინდი როკის ჟანრში ასრულებს საკუთარ სიმღერებს. ლაუდსფიქერსმა პოპულარობა მოიპოვა სიმღერებით World In My Eyes, Fallen In You, In This World და ა.შ. პოპულარუალია ლევან ლაუდაძის შესრულებული Black-ის Wonderful Life-ის ქავერიც. ჯგუფი 2009 წელს ჩამოყალიბდა.