"პოტერიადა" ამოუწურავია და სწორედ ამიტომ, პოტერჰედებს დიდი დრო არ აქვთ ხოლმე მოსაწყენად. ისინი ხშირად უბრუნდებიან ჯადოსნურ სამყაროზე შექმნილ ფილმებს და პოულობენ დეტალებს, რომლებიც აქამდე არავის შეუმჩნევია.

გარდა ამისა, მათ საკუთარი თეორიებიც აქვთ იმის შესახებ, რაზეც როულინგი გადაჭრით არ საუბრობს. სწორედ ასეთი თეორიაა ისიც, რომ სიკვდილის საჩუქრების მფლობელი ძმები დამბლდორის, ვოლდემორისა და ჰარის პროტოტიპები არიან.

გასაკვირი არაა, რომ ისინი კიდევ ერთხელ დაუბრუნდნენ ერთ-ერთ ყველაზე დაძაბულ სცენას და სევერუს სნეიპის შესაყვარებლად კიდევ ერთი მიზეზი მოგვცეს.

პოტერჰედების ახალი აღმოჩენა სწორედ იმ პერიოდის სნეიპზე გვიამბობს, როცა მას დამბლდორის მკვლელად და ვოლდემორის ერთგულ მსახურად მივიჩნევდით. ყველას გემახსოვრებათ სიკვდილის საჩუქრების მეორე ნაწილში პროფესორი მაკგონაგელის და სევერუსის შერკინება, როცა ორდენის წევრები სკოლას აიღებენ. კიდევ ერთხელ გადახედეთ, რამე მნიშვნელოვანს ამჩნევთ?

ფოტო: Warner Bros.

უფრო ახლო კადრიდან დააკვირდით. მართალია სულ რამდენიმე კადრია, მაგრამ მარტივად შესამჩნევია.

კარგი, დაგეხმარებით. ამ მომენტს ნამდვილად ვერ ვუწოდებთ შერკინებას, რადგან სევერუსი მაკგონაგელის შელოცვებს არ პასუხობს და მხოლოდ იგერიებს მათ, მაგრამ საგულისხმოა როგორ აკეთებს ამას. სევერუსი შელოცვას კი არ ისხლეტს, მიმართულებას უცვლის და მის ზურგს უკან მდგომ სიკვდილის მხვრელებს თიშავს. კიდევ ერთხელ დააკვირდით შენელებულ კადრს.

ფოტო: Warner Bros.

ამ კადრებით კიდევ ერთხელ მტკიცდება, რომ სევერუსი, მაშინაც კი როცა სკოლას ვოლდემორის წესებით მართავდა და მოსწავლეებს მკაცრად ექცეოდა, სინამდვილეში ორდენის წევრი იყო და არა სიკვდილის მხვრელი. სწორედ ამიტომ არ შეიპყრო მან ჰარი, ამიტომ არ შეებრძოლა მაკგონაგელს, ამიტომ გათიშა კეროვები და გზა გაუთავისუფლა ორდენის წევრებს.

დიახ, ამ პატარა კადრებით როულინგმა და ეიტსმა პოტერჰედებს ნამდვილი თავსატეხი გაუჩინეს. მსგავსი ისტორიები კი ჩვენ გვაძლევს საფუძველს ყოველი ახალი ამბავი ჰარი პოტერის შესახებ ამ სიტყვებით დავამთავროთ - After all this time? - ALWAYS!