ესპანური მოდის სახლის კრეატიულმა დირექტორმა, დემნა გვასალიამ, გადაწყვიტა, რომ 2020 წლის შემოდგომა-ზამთრის სეზონისთვის ბალენსიაგაში მაღალი მოდა დაებრუნებინა.

ეს იმას ნიშნავს, რომ 50-წლიანი პაუზის შემდეგ, პირველად გაიმართება ბალენსიაგას პირველი მაღალი მოდის კოლექციის ჩვენება. ისტორიულ შოუს 2020 წლის ივლისში, პარიზში უნდა ველოდოთ.

დამაარსებელმა, კრისტობალ ბალენსიაგამ მოდის სახლის კარები 1968 წელს დაკეტა და 4 წელიწადში გარდაიცვალა. ბალენსიაგა 1986 წელს გაიხსნა და მას ახალი სიცოცხლე მიშელ გომამ შთაბერა. 1987 წელს ის ჟოზეფ ტიმისტერმა ჩაანაცვლა, 1997 წელს კი — ნიკოლა ჟესკიერმა. სულ 2 წლით იყო მოდის სახლის კრეატიული დირექტორი ალექსანდრ ვენგი.

2015 წლიდან ბალენსიაგას შემოქმედებითი ხელმძღვანელი ქართველი დიზაინერი დემნა გვასალიაა. კრისტობალ ბალენსიაგას წასვლისა და ნახევარსაუკუნიანი პაუზის შემდეგ, მოდის სახლში მაღალი მოდის კოლექცია პირველად შეიქმნება — სწორედ დემნას ხელმძღვანელობით.

"ოტ კუტიური ამ სახლის საძირკველია, ასე რომ, ჩემს შემოქმედებით ვალდებულებად მივიჩნევ მის დაბრუნებას. ჩემთვის, კუტიური კრეატიული თავისუფლების ამოუწურავი ნაწილი და ინოვაციური პლატფორმაა. ეს მხოლოდ სამოსის შექმნის განსხვავებული ნაწილი არაა, ამით დავაბრუნებთ ბალენსიაგას თანამედროვე ხედვას თავის წარმოშობასთან", — განაცხადა დემნა გვასალიამ.

როგორი იყო ბალენსიაგას "ოტ კუტიური" კრისტობალ ბალენსიაგას დროს, ანუ დემნა გვასალიამდე: