გახსოვთ GTA-ის პირველი ვერსია, რომელსაც Vice City ერქვა? შესაძლოა ამ ინფორმაციამ თავი მოხუცებულად გაგრძნობინოთ, მაგრამ უნდა გითხრათ, რომ მისი გამოსვლიდან 16 წელი გავიდა. იმ დროისთვის, Grand Theft Auto Vice City ერთ-ერთი საუკეთესო ვიდეო თამაში იყო, რომელმაც მილიონობით ადამიანი მიაჯაჭვა სათამაშო კონსოლებთან.

გავრცელებული ინფორმაციის თანახმად, 20 წლის იუბილეზე GTA-ის შემქმნელები შესაძლოა დაუბრუნდნენ იმ ქალაქს, საიდანაც ყველაფერი დაიწყო. GTA VI-ის მთავარი ქალაქი, სავარაუდოდ, კვლავ Vice City იქნება, ერთ-ერთ მთავარ პერსონაჟად კი ქალი დაემატება. მაიამის ქვიშიანი სანაპიროების გარდა, თამაშს დაემატება გასვლითი მისიები სამხრეთ ამერიკაში, რომლის შესრულებაც მთავარ პერსონაჟებს მოუწევთ.

ამ ინფორმაციას პოპულარული Youtube არხი, The Know ავრცელებს. მისი კონტრიბუტორები გამოირჩევიან ექსკლუზიური ინფორმაციის მოპოვებითა და სანდოობით. სწორედ ისინი იყვნენ პირველები, ვინც Dark Souls III-ის დეტალები გაასაჯაროვა.

სავარაუდოდ, Rockstar Games-ი GTA VI-ს 2022 წელს გამოუშვებს, თავისი არსებობის ზუსტად ოცი წლის იუბილეზე.