დღეს, 9 იანვარს, სააპელაციო სასამართლომ უცვლელად დატოვა ძალაში ე.წ. ფოტოგრაფების საქმეზე მსჯავრდებული პირების - დავით დევნოზაშვილისა და ალექსანდრე მუხაძის მიმართ 2017 წლის 20 ივლისს გამოტანილი გამამტყუნებელი განაჩენი.

დავით დევნოზაშვილი დამნაშავედ სცნეს სამსახურებრივი უფლებამოსილების გადამეტებაში, ჩადენილი ძალადობით და დაზარალებულის პირადი ღირსების შეურაცხყოფით. ალექსანდრე მუხაძე კი გამტყუნდა სამსახურებრივი უფლებამოსილების გადამეტებისათვის, რამაც ფიზიკური პირის უფლების, საზოგადოების და სახელმწიფოს კანონიერი ინტერესის არსებითი დარღვევა გამოიწვია.

სასამართლოს გადაწყვეტილებით, დავით დევნოზაშვილს განესაზღვრა 4 წლით და 6 თვით თავისუფლების აღკვეთა. ასევე დამატებითი სასჯელის სახით 1 წლით 4 თვის ვადით ჩამოერთვა თანამდებობის დაკავების უფლება. ალექსანდრე მუხაძეს კი საბოლოოდ განესაზღვრა 1 წლით და 6 თვის ვადით თავისუფლების აღკვეთა, ამავე ვადით ჩამოერთვა თანამდებობის დაკავების უფლება.

სახელმწიფო ბრალდების ვერსიით, შსს-ს კონტრდაზვერვის დეპარტამენტის უფროსის მოადგილემ დავით დევნოზაშვილმა ხუთ დაკავებულ ფოტოგრაფზე ფსიქოლოგიური ზეწოლისა და დაშინების გზით გადაწყვიტა, მათგან მიეღო წინასწარ შეთხზული აღიარებითი ჩვენებები ჯაშუშურ ქსელში მონაწილეობის შესახებ.

"მიზნის განსახორციელებლად დავით დევნოზაშვილი 2011 წლის 7 და 8 ივლისს, დროებითი მოთავსების იზოლატორში, არაოფიციალურად, ისე რომ მისი შესვლა არ დაფიქსირებულა რეგისტრაციის ჟურნალში, რამოდენიმეჯერ, ცალ-ცალკე შეხვდა დაკავებულ ცოლ-ქმარს ირაკლი და ნათელა გედენიძეებს, რომლებსაც ნათელა გედენიძის პირადი ცხოვრების ამსახველი პიკანტური ფოტოს გავრცელების მუქარით და შვილების მომავალზე შანტაჟით, იძულებით მიაცემინა ჯაშუშურ ქსელში მონაწილეობასთან დაკავშირებით ცრუ აღიარებითი ჩვენებები", - ნათქვამია პროკურატურის განცხადებაში.

გამოძიება ასევე ირწმუნება, რომ ასევე, #8 საპყრობილეში, დავით დევნოზაშვილი რამოდენიმეჯერ შეხვდა ზურაბ ქურციკიძეს, რომელიც ფსიქოლოგიური ზეწოლის გზით აიძულა მიეცა "წინასწარ შეთხზული ცრუ აღიარებითი ჩვენება".

2011 წლის 7 ივლისს, შსს-ს თანამშრომლებმა ჯაშუშობის ბრალდებით დააკავეს ევროპის პრეს ფოტოსააგენტო ეპა-ს ფოტორეპორტიორი ზურაბ ქურციკიძე, საგარეო საქმეთა სამინისტროს ფოტორეპორტიორი გიორგი აბდალაძე, პრეზიდენტის ადმინისტრაციის ფოტორეპორტიორი ირაკლი გედენიძე და მისი მეუღლე, რედაქცია პრაიმ ტაიმის ფოტორედაქტორი ნათელა გედენიძე.