ამერიკელმა რეჟისორმა, მუსიკოსმა და სცენარისტმა დევიდ ლინჩმა, დღეს, 20 ნოემბერს, გიგა აგლაძესთან და თავის ფონდის წარმომადგენლებთან მედიასთან შეხვედრა გამართა.

შეხვედრისას ლინჩმა აღნიშნა, რომ საქართველოში გიგა აგლაძესთან ერთად კინოსკოლას ხსნის. ამერიკელმა რეჟისორმა ამ თემაზე ვრცლად ისაუბრა:

"გიგა და ამ ჯგუფის წევრები აპირებენ, რომ კინოს სკოლა გახსნან საქართველოში. რაც საერთაშორისო ფილმის ფესტივალზე გაგვიძღვება. მე სკოლების ფანი არ ვარ, მძულდა საშუალო სკოლა და ვფიქრობ, რომ იქ გატარებული ოთხი წელი დროის კარგვა იყო. თუმცა, როდესაც პენსილვანიის სახვითი ხელოვნების აკადემიაში მოვხვდი, სკოლების მიმართ დადებითად განვეწყვე. ვფიქრობ, რომ სკოლა საშუალებას გვაძლევს, რომ ვისწავლოთ ტექნიკური ხერხები, რაც ვფიქრობ, რომ კინოს მიმართულებით მოღვაწე სტუდენტებისთვის აუცილებელია".

დევიდ ლინჩის თქმით, მისი კინოსკოლა ორ მნიშვნელოვან ცოდნას მისცემს სტუდენტებს:

"ეს იქნება ტექნიკური ცოდნა და ასევე სწავლა პრაქტიკული გამოცდილების მიღებით. სწავლა კეთების პროცესში ძალიან მნიშვნელოვანია. ტექნიკური ცოდნის მიღების შემდეგ, ისინი ფილმებს გადაიღებენ".

ლინჩის თქმით, სტუდენტებს სურვილის შემთხვევაში ტრანსცენდენტური მედიტაციის მიღების საშუალებაც ექნებათ, რაც მათ მუშაობის პროცესში სიმშვიდის, ბედნიერებისა და კრეატიულობის გაზრდაში დაეხმარებათ. რეჟისორის თქმით, მედიტაცია მათ სტრესულ სამუშაოსთან გამკლავებაში დაეხმარება.