მსოფლიოს ქვეყნებმა ახალი წელი იზეიმეს.

კირიტიმატის კუნძული — წყნარი ოკეანის შორეულ ქვეყანაში, კირიბატიში — პირველი ადგილი იყო, სადაც 2026 წელი დადგა. იქ მყოფმა ერთ-ერთმა ტურისტმა თქვა, რომ ახალი წელი "პლაჟზე აღნიშნა, სადაც არ იყო არც სატელიტები, არც ადამიანური ცხოვრების ნიშნები — სრული სიბნელე და უთვალავი კიბორჩხალა".

ლონდონში ადამიანები ღამის ცაზე აფეთქებული ათასობით ფეიერვერკით დატკბნენ, ხოლო ედინბურგში, სიცივის შესახებ გაცემული გაფრთხილებების მიუხედავად, ხალხი "ჰოგმანეის" აღსანიშნად შეიკრიბა.

ნიუ-იორკში, ტაიმს სკვერზე, ტრადიციული ბურთის ჩამოშვებას კონფეტი და შეძახილები ახლდა — ღონისძიებას დაახლოებით ერთი მილიონი ადამიანი ადევნებდა თვალს.

წარმოგიდგენთ მსოფლიოს სხვადასხვა კუთხიდან შერჩეულ საუკეთესო ფოტოებს.

რიო-დე-ჟანეირომ განსაკუთრებით შთამბეჭდავი ფეიერვერკების შოუ გამართა იმ იმედით, რომ 2024 წელს დამყარებული გინესის მსოფლიო რეკორდი — ახალი წლის ყველაზე მასშტაბური ზეიმისთვის — გაეუმჯობესებინა. გავრცელებული ინფორმაციით, ზეიმზე დაახლოებით 2.5 მილიონი ადამიანი შეიკრიბა.

დიდი ბრიტანეთი ახალ წელს ლონდონის ბიგ-ბენის თავზე გამართული შთამბეჭდავი ფეიერვერკების შოუთი შეეგება.

ბერლინში გამართული ზეიმის დროს ფეიერვერკებმა ბრანდენბურგის კარიბჭის თავზე ღამის ცა გაანათეს.

საფრანგეთის დედაქალაქ პარიზში, შანზ-ელიზეს გამზირზე შეკრებილი ხალხი ტრიუმფალურ თაღზე გამართულ შოუსა და ფეიერვერკებს ადევნებდა თვალს.

ავსტრალიამ სიდნეის ოპერის თეატრისა და სიდნეის ჰარბორ ბრიჯის თავზე ცა თავისი სახელგანთქმული ფეიერვერკების შოუთი გაანათა.

სიდნეიში ზეიმი სევდამ დაჩრდილა — ქვეყანა 14 დეკემბერს ბონდის სანაპიროზე მომხდარ თავდასხმას იხსენებდა, რომლის შედეგადაც 15 ადამიანი დაიღუპა.

ადგილობრივი დროით 23:00 საათზე სიდნეის ნავსადგური ერთი წუთით დადუმდა; შეკრებილმა ხალხმა მსხვერპლთა ხსოვნისთვის შუქები აანთო. ჰარბორ ბრიჯის საყრდენებზე კი ებრაული მენორას გამოსახულების პროექცია მიანათეს.

ფეიერვერკი სინგაპურში, მარინა ბეის სანაპიროზე.

ტაილანდში ათასობით ადამიანი შეეგება ახალ წელს ჩაო-ფრაიას მდინარის სანაპიროს გასწვრივ.

სეულში, სამხრეთ კორეის ყველაზე მაღალ შენობაზე ლაზერები მიანათეს.

მსოფლიოს სხვა კუთხეებში ქვეყნები ახალი წლის დადგომას საკუთარი ტრადიციებით აღნიშნავდნენ.

საფრანგეთის სამხრეთში, ლე კაპ დ’აგდში მდებარე ნუდისტურ სანაპიროზე, ტანსაცმლითა და შიშველმა ზეიმის მონაწილეებმა ახალი წლის აღსანიშნად ზღვაში ბანაობის ტრადიციაში მიიღეს მონაწილეობა.

დანიაში, კოპენჰაგენში მდებარე აილენდს ბრიუგეს ნავსადგურზე მოცურავეებმაც გაბედეს ცივ წყალში შესვლა ტრადიციული ჩაყვინთვისთვის.

იაპონიის ქალაქ ოსაკაში ტრადიციულ კიმონოებში გამოწყობილმა ახალგაზრდა ქალებმა, წლის დასასრულის აღსანიშნად, შინტოურ რიტუალურ მსვლელობაში მიიღეს მონაწილეობა სუმიოში ტაიშაში — იაპონიის ერთ-ერთ უძველეს შინტოურ ტაძარში.

პოლონეთის ქალაქ კრაკოვში ფერად სამოსში გამოწყობილმა მორბენლებმა ძველი ქალაქის ქუჩებში კრაკოვის ტრადიციულ საახალწლო გარბენში მიიღეს მონაწილეობა.

ინდონეზიაში, ბალის კუნძულზე მდებარე დენპასარში, ბავშვებმა და ზრდასრულებმა ტრადიციული ცეკვა შეასრულეს 2025 წლის მზის "გასათავისუფლებლად" და 2026 წლის მზის მისასალმებლად.