19 დეკემბერს, ევროკომისიამ პარტნიორი ქვეყნების მხრიდან უვიზო მიმოსვლის ვალდებულებების დაცვის შესახებ ანგარიში გამოაქვეყნა, რომლის მიხედვითაც საქართველომ, საბოლოო ჯამში, შესაძლოა, უვიზო ქვეყნის სტატუსი მთლიანად დაკარგოს.

ევროკომისა შეშფოთებას გამოთქვამს საქართველოში ფუნდამენტური უფლებებისა და თავისუფლებების სერიოზული დარღვევების გამო და აღნიშნავს, რომ საქართველომ ვიზის ლიბერალიზაციის დიალოგის ფარგლებში აღებული არაერთი ვალდებულება დაარღვია.

"ევროკომისიამ საქართველოში ფუნდამენტური უფლებებისა და თავისუფლებების სერიოზული დარღვევების გამო, მათ შორის დისკრიმინაციის აკრძალვის პრინციპების დარღვევასთან დაკავშირებით შეშფოთება გამოთქვა, არაერთხელ მოუწოდა ქართულ ხელისუფლებას, დაუყოვნებლივ მიიღოს ზომები ამ პრობლემების აღმოსაფხვრელად და კომისიის რეკომენდაციების შესასრულებლად. მიუხედავად ამისა, საქართველომ დაარღვია ვიზის ლიბერალიზაციის დიალოგის ფარგლებში აღებული არაერთი ვალდებულება და ვერ შეასრულა ვიზის შეჩერების მექანიზმის მეშვიდე ანგარიშის რეკომენდაციები. ამ უკუსვლის სისტემური და გამიზნული ხასიათის გათვალისწინებით, კომისია განახლებული ვიზის შეჩერების მექანიზმის ფარგლებში, შესაბამისი ზომების მიღებას განიხილავს, რომელიც ძალაში 2025 წლის 30 დეკემბერს შევა.

ახალი წესების მიხედვით, პირველ ეტაპზე ვიზის შეჩერება შესაძლოა შეეხოს საქართველოს მიერ გაცემული დიპლომატიური, სამსახურებრივი და ოფიციალური პასპორტების მფლობელებს, რომლებიც ძირითადად პასუხისმგებელნი არიან კომისიის რეკომენდაციების შეუსრულებლობაზე. მოქმედი წესებისგან განსხვავებით, ახალი მექანიზმი უზრუნველყოფს შეჩერების ერთიან გამოყენებას ევროკავშირის ყველა წევრ სახელმწიფოში, ვინაიდან დიპლომატიური, სამსახურებრივი და ოფიციალური პასპორტების მფლობელებისთვის ორმხრივი უვიზო რეჟიმი აღარ იქნება ხელმისაწვდომი მას შემდეგ, რაც ევროკავშირის დონეზე ამ ჯგუფებისთვის ვიზის მოთხოვნა ხელახლა დაწესდება. მეორე ეტაპზე ვიზის შეჩერება შესაძლოა გავრცელდეს მთელ მოსახლეობაზე, თუ საქართველოს ხელისუფლება პრობლემებს არ მოაგვარებს. საბოლოოდ, საქართველომ შესაძლოა სრულად დაკარგოს უვიზო რეჟიმი და გადაინაცვლოს ევროკავშირის იმ მესამე ქვეყნების სიაში, რომელთა მოქალაქეებს ვიზა სჭირდებათ", — წერია ანგარიშში.