ამერიკის შეერთებული შტატების პრეზიდენტი დონალდ ტრამპი დღეს, 28 ივლისს დასავლეთ შოტლანდიაში, გოლფის კურორტზე, ბრიტანეთის პრემიერმინისტრ კირ სტარმერს უმასპინძლებს, სადაც Reuters-ის ინფორმაციით, მოლაპარაკებები, სავარაუდოდ, ორმხრივ სავაჭრო შეთანხმებასა და ღაზაში შიმშილის კრიზისის გაუარესებას შეეხება.

ტრამპის განცხადებით, ევროკავშირთან სავაჭრო შეთანხმებით სტარმერიც კმაყოფილი დარჩება.

"დიდი ბრიტანეთის პრემიერმინისტრი, მიუხედავად იმისა, რომ ის [ევროკავშირთან მოლაპარაკებებში] არ მონაწილეობს, ძალიან ბედნიერი იქნება, რადგან, მოგეხსენებათ, იქაც გარკვეული ერთიანობაა დამყარებული," — განაცხადა ტრამპმა.

გუშინ, 27 ივლისს, საღამოს ცნობილი გახდა, რომ ამერიკის შეერთებულმა შტატებმა და ევროკავშირმა სავაჭრო შეთანხმებას მიაღწიეს. BBC-ის ცნობით, გადამწყვეტი მოლაპარაკებები შოტლანდიაში აშშ-ის პრეზიდენტ დონალდ ტრამპსა და ევროკომისიის პრეზიდენტ ურსულა ფონ დერ ლაიენს შორის გაიმართა. აშშ-ის მხრიდან ევროკავშირის საქონელზე 15%-იანი ტარიფის დაწესება გადაწყდა, რაც ორჯერ ნაკლებია იმ 30%-იან იმპორტის გადასახადთან შედარებით, რომლის დაწესებასაც ტრამპი მოითხოვდა. სანაცვლოდ, ევროკავშირი ამერიკული პროდუქციისთვის,გარკვეულ კატეგორიებზე, ნულოვანი ტარიფით ბაზრებს გახსნის.

შეთანხმებით გარკვეულ საქონელზე გამონაკლისებია გათვალისწინებული, მათ შორის ავიაციის ნაწილებზე, კონკრეტულ ქიმიკატებსა და აგრარული პროდუქტებზე. ამავდროულად, ტრამპის მიერ დაწესებული 50%-იანი გლობალური ტარიფი ფოლადსა და ალუმინზე ძალაში რჩება.