რუსთაველის გამზირზე მოქალაქეზე ე.წ. ელექტროშოკით თავდასხმის ფაქტზე, შინაგან საქმეთა სამინისტრომ გამოძიება დაიწყო.

უწყებაში აცხადებენ, რომ გამოძიება სისხლის სამართლის კოდექსის 126-ე მუხლით არის დაწყებული, რაც ძალადობას გულისხმობს.

ცნობისთვის, გუშინ, გამომცემელთა მსოფლიო ასოციაციის პრეზიდენტმა გვანცა ჯობავამ სოციალურ ქსელში ვიდეო გაავრცელა, სადაც მოქალაქე ჰყვება, თუ როგორ დაესხა მას უცნობი პირი თავს ე.წ. ელექტროშოკით. პროევროპული აქციის მონაწილეების ინფორმაციით, თავდამსხმელი პოლიციას თავდაპირველად გაექცა.

"ელექტროშოკით თავს დაესხნენ რუსთაველზე ამ ბიჭს და ორმოცდაათმა პოლიციელმა დამნაშავე ხან დაიჭირა, ხან გაექცათ და დაბნეულები აქეთ-იქით იყურებოდნენ. ახლა ვითხოვთ დამნაშავის სახელს და გვარს და ინფორმაციას შსს-გან, ბოლოს და ბოლოს დაიჭირეს თუ არა? ერთი პლასტმასის ბოთლისთვის ზიან ჩვენი თანამებრძოლები ციხეში და ელექტროშოკის ტრიალისთვის ხელის განძრევა არ უნდოდა პოლიციას" — წერს გვანცა ჯობავა Facebook-ზე და ვიდეოს აქვეყნებს.