ჩეხეთის ელჩი საქართველოში, პეტრ კუბერნატი X-ზე ეხმაურება 18 თებერვალს, გამთენიისას თბილისის საერთაშორისო აეროპორტში საქართველოს მე-5 პრეზიდენტ სალომე ზურაბიშვილზე თავდასხმას. პეტრ კუბერნატის თქმით, ეს სამარცხვინო ფაქტია და აუცილებლად უნდა იყოს გამოძიებული.

"მე-5 პრეზიდენტ სალომე ზურაბიშვილზე გუშინდელი თავდასხმა სამარცხვინოა და უნდა იყოს სამართლიანად გამოძიებული, ისევე როგორც ყველა სხვა თავდასხმა და ძალადობა მშვიდობიან მომიტინგეებსა და ჟურნალისტებზე. კანონის წინაშე ყველა ადამიანი თანასწორია. სამართლიანი და დროული სასამართლოს უფლება საქართველოს კონსტიტუციითაა გარანტირებული", — წერს ჩეხეთის ელჩი.

ინფორმაციისთვის, მიუნხენის უსაფრთხოების კონფერენციიდან დაბრუნებულ საქართველოს მე-5 პრეზიდენტს, სალომე ზურაბიშვილის და პარტია გახარია საქართველოსთვის ლიდერს, გიორგი გახარიას, თბილისის აეროპორტში უცნობი პირები დახვდნენ, რომლებმაც მათ კვერცხები დაუშინეს.