რა უნდა ვთქვათ, ყველგან ბრიუსელი, არსად ევროპა, — ასე უპასუხა უნგრეთში სამუშაო ვიზიტით მყოფმა ქართული ოცნების პარლამენტის თავმჯდომარემ, შალვა პაპუაშვილმა ევროკავშირის საგარეო საქმეთა მინისტრების ინიციატივის შესახებ განაცხადა, რომლის თანახმადაც, ევროკომისია ქართული დიპლომატიური პასპორტების მფლობელებისთვის ვიზალიბერალიზაციის შეჩერების საკითხზე მუშაობს.

მისი თქმით, "ევროპულ ღირებულებებს სცილდებიან ბრიუსელელი ჩინოვნიკები".

"რა უნდა ვთქვათ, ყველგან ბრიუსელი, არსად ევროპა. ასე შეიძლება შეფასდეს. სამწუხაროა, რომ ევროპულ ღირებულებებს სცილდებიან ბრიუსელელი ჩინოვნიკები. ჩვენ ვნახეთ წინასაარჩევნო კამპანიაში ევროკავშირის სხვადასხვა წევრი ქვეყნის წარმომადგენლების პირდაპირი ჩართულობა, განსაკუთრებით გამოირჩეოდა ევროკავშირის პოსტსაბჭოთა წევრები, პირდაპირ მონაწილეობდნენ ჩვენს არჩევნებში, ეს დღისით, მზისით ხდებოდა, დაუფარავად, უხეშად და ქართველმა ხალხმა მათ ყველას უთხრა უარი იმაზე, რომ მათი მითითებით აერჩია ქართველ ხალხს საკუთარი პოლიტიკური ხელმძღვანელობა. ეს არის საერთო ჯამში ქართველი ხალხის დასჯის მცდელობა იმ ჯგუფების მხრიდან, რომლებიც მონაწილეობდნენ ქართულ არჩევნებში უკანონოდ და საერთაშორისო სამართლის დარღვევით და დამარცხდნენ ამ არჩევნებში," — თქვა პაპუაშვილმა ჟურნალისტებთან.

შეგახსენებთ, რომ "ყველგან პოლიცია, არსად სამართალი" ქვეყანაში მიმდინარე საპროტესტო აქციების ერთ-ერთი სლოგანია.

ევროკავშირის საგარეო საქმეთა მინისტრები დღეს ბრიუსელში იკრიბებიან, სადაც სხვა საკითხებთან ერთად საქართველოზეც იმსჯელებენ. ევროკავშირის წევრი ქვეყნების ელჩებმა ქართული დიპლომატიური და სამსახურებრივი პასპორტებისთვის უვიზო რეჟიმის შეჩერებას მხარი 24 იანვარს დაუჭირეს და შეზღუდვა ოფიციალურად ბრიუსელში, სავარაუდოდ, დღეს გაფორმდება. წინადადებაზე ევროკომისიამ იმუშავა, სამუშო დოკუმენტი 23 იანვრითაა დათარიღებული.

სხდომას ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში კაია კალასი უხელმძღვანელებს. შეხვედრა თბილისის დროით 13:00 საათზე დაიწყება.