თბილისის საქალაქო სასამართლოში, სადაც პროევროპულ აქციებზე დაკავებული 8 პირის სასამართლო პროცესი მიმდინარეობს ბრალდებულების ადვოკატებმა სხდომათა დარბაზი დატოვეს. ამის მიზეზად ისინი მათი მოთხოვნების უგულებელყოფას ასახელებენ. ადვოკატები მოსამართლეს სთხოვდნენ პროცესი დიდ დარბაზში გაგრძელებულიყო, რაზეც უარი მიიღეს.

როგორც ცნობილი გახდა, სწორედ ხალხმრავლობისა და უჰაერობის გამო ერთ-ერთ მსჯავრდადებული, ირაკლი მიმინოშვილი შეუძლოდ გახდა.

ირაკლი მიმინოშვილის ადვოკატი, შოთა თუთბერიძე პუბლიკას უყვება, რომ მოსამართლემ სასწრაფო დახმარებაც კი არ გამოიძახა, თვითონ მოუხდა სასწრაფო სამედიცინო დახმარების ეკიპაჟის გამოძახება. საქალაქო სასამართლოში მოსულმა მედიკოსებმა გასინჯეს ირაკლი მიმინოშვილი და მათი თქმით, მსჯავრდადებულის შეუძლოდ გახდომის მიზეზი უჰაერობა იყო.

"მოსამართლე არის უმეცრად გაჯიუტებული. ბოლოს ვუთხარით, კარგი, დარბაზს თუ ვერ ვიცვლით, აქ არის საბადრაგო სამსახურის თანამშრომლებმა, აქ პატიმრებთან 15-20 საბადრაგო სამსახურის თანამშრომელია, დატოვოს ის სივრცე, სადაც პატიმრები არიან, რომ ბრალდებულებს ჰქონდეთ სუნთქვის შესაძლებლობა. ამაზეც მივიღეთ უარი. რის შემდეგაც მე და ჩემმა კოლეგებმა ვეღარ დავინახეთ ვეღარც მიზანი და ვეღარც მიზეზი რატომ უნდა ვყოფილიყავით სასამართლო პროცესზე იმის ფონზე, რომ მუდმივად ხდებოდა ჩვენი პოზიციების ნიველირება, არ გვაძლევდნენ პოზიციის გამოხატვის საშუალებას, აბსოლუტურად ჩვენი ყველა მოთხოვნა იქნა უარყოფილი, კომუნიკაციის საშუალება არ გვქონდა ზოგიერთ ადვოკატს მოსამართლესთანაც კი, ეს არის სასამართლო დარბაზი, სადაც არის გათვლილი ადგილები 2 ადვოკატზე, 2 პროკურორზე და რამდენიმე ათეულ დამსწრეზე", — აცხადებს ირაკლი მიმინოშვილის ადვოკატი, შოთა თუთბერიძე.

მისი თქმით, შესაძლოა სხდომა გაგრძელდეს და ის მოვლენების განვითარებას 2 შესაძლო ვარიანტს ხედავს:

"შესაძლებელია სხდომა გაგრძელდეს. ახლა 2 გზას ვხედავ: მოსამართლემ შეწყვიტოს ეს უმეცარი სიჯიუტე, ჩემს ბავშვობაში სხვა რომ აკეთებდა ამას ეძახდნენ "გავირებას". ეს გაჯიუტება უნდა შეწყვიტოს მოსამართლემ და მოგვცეს საშუალება შესაბამის დარბაზში ადეკვატური პროცესი ჩავატაროთ, ან მეორე გზა აქვს ამ სიჯიუტეში დარჩეს და ჩართოს საქმეში სახაზინო ადვოკატები, ნაწილის საქმე განიხილოს ადვოკატის გარეშე, ნაწილის — სახაზინო ადვოკატების საშუალებით, მაშინ როცა ამ ადამიანებს ადვოკატი უკვე ჰყავთ არჩეული", — აცხადებს თუთბერიძე.