მას შემდეგ, რაც ტელეკომპანია "ფორმულას" ჟურნალისტის ელისო ჯარიაშვილის შეკითხვებზე ვერ უპასუხა, ოცნების პრემიერმინისტრი ირაკლი კობახიძე პრესკონფერენციიდან გაიქცა.

ჟურნალისტი შეეცადა კობახიძისგან მიეღო პასუხი, ინსტიტუციურად ვინ გასცემდა ბრძანებას დემონსტრანტების დარბევაზე. კობახიძემ კითხვას არ უპასუხა და განაცხადა, რომ ის საუბრობდა ქართველი ხალხის სახელით.

"მე ვსაუბრობ მილიონ ასოცი ათასი ამომრჩევლის სახელით — ეს ერთი, მეორე, რაც შეეხება მშვიდობას, ერთმანეთისგან განვასხვაოთ ტერმინები, ჩვენ გადავარჩინეთ ქვეყანა ომს", — განაცხადა ირაკლი კობახიძემ.

ჟურნალისტმა კობახიძეს უპასუხა, რომ ის, რასაც ქუჩაში სპეცრაზმი აკეთებდა, ომი იყო.

"ის ომი არ არის, რასაც ახლა ქუჩაში აკეთებს სპეცრაზმი, ახალგაზრდების დასახიჩრების ბრძანებას რუსეთიდან იღებს ბიძინა ივანიშვილი, თუ მისი თვითშემოქმედებაა, ასევე მაინტერესებს სამშობლოს ღალატში ფულს იღებთ თუ ესეც თვითინიციატივაა? გურამ როგავას რომ სასტიკად სცემეს, ვინ გასცა ეს ბრძანება? ვინ ჩაიდინა ეს დანაშაული და რატომ არ არის გამოძიებული? ახალგაზრდების დასახიჩრების ბრძანება ვისი ინიციატივაა? — ივანიშვილის, რუსეთიდან მიღებული ბრძანებაა, თქვენი თვითშემოქმედებაა, მიპასუხეთ", — განაცხადა ელისო ჯარიაშვილმა.

მისი თქმით, სირცხვილია ქვეყნის ღალატი, რასაც ხელისუფლება აკეთებს.

"სირცხვილი იცით რა არის? ქუჩაში რომ ხალხს არბევენ, სირცხვილია, როცა თვალში დამიზნებით სცემენ ადამიანებს, გადაივსო კლინიკები , გადაივსო იზოლატორები, ყველა ოპოზიციურ პარტიაში ახლა არის რეიდი, რას ნიშნავს ეს? ვინ გასცემს ბრძანებას? — იკითხა ჟურნალისტმა.

ამის შემდეგ ირაკლი კობახიძემ პრესკონფერენცია დატოვა.