დემოკრატიის კვლევის ცენტრი 29 ნოემბერს შსს — ს მიერ დემონსტრანტების წინააღმდეგ გამოყენებულ დაშლის კანონიერების საკითხს ეხმაურება. ორგანიზაციის გავრცელებულ წერილში ნათქვამია, რომ შინაგან საქმეთა სამინისტრომ მშვიდობიანი აქცია უსაფუძვლოდ, არაპროპორციული ძალის გამოყენებით დაშალა.

ორგანიზაცია მიუთითებს მშვიდობიან დემონსტრანტებზე თავდასხმისა და განსაკუთრებული სისასტიკით დაკავების ფაქტებს და ხაზგასმით აცხადებს, რომ პოლიციის მიერ გამოყენებულ ძალადობას არაფერი აქვს საერთო კანონიერ საპოლიციო ღონისძიებებთან.

"29 ნოემბერს სულ მცირე, 22 ჟურნალისტის ფიზიკური დაზიანება ასევე ცხადყოფს, რომ ჟურნალისტები, რომლებიც პირდაპირ ეთერში გადასცემდნენ ან აღბეჭდავდნენ მშვიდობიანი დემონსტრანტების დარბევის ფაქტებს, შსს-ს მიზანში ჰყავდა ამოღებული.
გავრცელებული განცხადებით "გააფრთხილა" დემონსტრანტები, სამართალდამცველთა მითითებების შეუსრულებლობის შემთხვევაში, იძულებითი ღონისძიებების გამოყენებასთან დაკავშირებით. მიუხედავად იმისა, რომ არ არსებობდა აქციის დაშლის სამართლებრივი საფუძველი, ძალოვანმა უწყებებმა შსს-ს განცხადების გავრცელებიდან რამდენიმე წუთში მშვიდობიანი დემონსტრანტები უკანონოდ დაარბიეს.
აქციის ზოგიერთი მონაწილისთვის მიყენებული ფიზიკური დაზიანების ხასიათი მოწმობს, რომ დაზიანებები წარმოადგენდა ჟურნალისტებისა და პოლიტიკოსების მიმართ აშკარა ანგარიშსწორებას.
შსს-ს სახელმძღვანელო ინსტრუქციის მიხედვით, სამართალდამცავი ორგანოების წარმომადგენლებმა ფიზიკური ძალა თანაზომიერების პრინციპის დაცვით, მხოლოდ უკიდურესი აუცილებლობის შემთხვევაში და კონკრეტული გარემოებისათვის საჭირო მინიმალური ოდენობით უნდა გამოიყენონ. ორგანიზაციის შეფასებით, არც ერთ შემთხვევაში არ ყოფილა ფიზიკური ძალის გამოყენების წინაპირობა.
დემოკრატიის კვლევის ცენტრი მოუწოდებს:
სამართალდამცავი ორგანოს წარმომადგენლებს - არ შეასრულონ უკანონო ბრძანება; იხელმძღვანელონ საქართველოს კანონმდებლობით და პროფესიული ღირსებით.
სპეციალურ საგამოძიებო სამსახურს - დაუყოვნებლივ გამოიძიოს სამართალდამცავთა მხრიდან დანაშაულის ჩადენის შემთხვევები და იმოქმედოს მოქმედი კანონმდებლობის შესაბამისად", — ნათქვამია განცხადებაში.