პრეზიდენტის ადმინისტრაციის ინფორმაციით, ვენეციის კომისიის პლენარული სხდომა მიესალმა საქართველოს პრეზიდენტის ვეტოს საკონსტიტუციო სასამართლოს შესახებ კანონში პარლამენტის მიერ შეტანილ ცვლილებებზე და პარლამენტის მიერ მის გაზიარებას:

"კომისიის პრეზიდენტმა, ჯანი ბუკიკიომ ამ პროცესს „ბრძნული და კარგი კომპრომისი“ უწოდა. ლევან ბოძაშვილმა კომისიას საქართველოს პრეზიდენტის გიორგი მარგველაშვილის სახელით მადლობა გადაუხადა დახმარებისთვის და დასკვნის უმოკლეს ვადებში მომზადებისათვის. კომისიამ დასკვნა პლენარულ სხდომაზე დაამტკიცა".

საუბარია საკონსტიტუციო სასამართლოს შესახებ კანონში შეტანილ ცვლილებებზე, რომლის თავდაპირველი ვარიანტი პრეზიდენტმა ვენეციის კომისიას დასკვნისთვის გადაუგზავნა. კომისიისგან მიღებული დოკუმენტის შემდეგ, შენიშვნების ნაწილობრივი გათვალისწინებით, პრეზიდენტმა კანონს ვეტო დაადო, რომელიც პარლამენტმა არ დაძლია და კანონი ძალაში შევიდა.

ამ დროისთვის კანონის არაკონსტიტუციურობაზე საუბრობენ, როგორც არასამთავრობო ორგანიზაციები, ისე ოპოზიციის წარმომადგენლები და განმარტავენ, რომ ვინაიდან მარგველაშვილმა კომისიის მიერ შემუშავებული რამდენიმე პუნქტი თავის ვეტოში არ გაიზიარა, კანონი ხარვეზებს შეიცავს.