პარტია გირჩი აცხადებს, რომ ცენტალურმა საარჩევნო კომისიამ, ნახევარ დღეში გადაამოწმა მათი ხელმოწერები და ჩააბარა შეტყობინება, სადაც ნათქვამია, რომ 27 990 ხელმოწერიდან 27 977 არის ბათილი, ხოლო 13 - ნამდვილი.

გირჩი მიმართავს საარჩევნო კომისიას, საჯაროდ განმარტონ შემოწმებისთვის გამოყენებული მეთოდოლოგია და ბათილად ცნობის მიზეზები:

"დავუშვათ, ხელმოწერების შემოწმება დაიწყეთ 9 საათზე და დაასრულეთ 17 საათზე, შემდეგ ნახევარ საათში მოამზადეთ შეტყობინება და ერთ საათში ჩაგვაბარეთ (ჩაგვბარდა დაახლოებით 18:30 საათზე). ანუ, საათში შეამოწმეთ დაახლოებით 3 500 ხელმოწერა, წუთში დაახლოებით 60 ხელმოწერა, წამში ერთი ხელმოწერა. ჩვენ ვფიქრობთ, რომ საოცარი ტემპია თუნდაც 3 შემმოწმებლისთვის (თუ, რა თქმა უნდა, ხელმოწერების ავტოსწრაფშემმოწმებელი არ არის გამოგონებული და ამის შესახებ ჩვენ ინფორმაციას არ ვფლობთ)".

გირჩის განცხადებით, ცესკოს შეტყობინებაში არ არის მითითებული რა მეთოდოლოგია გამოიყენეს ხელმოწერების შესამოწმებლად და რა მიზეზით სცნეს ბათილად 27 977 ხელმოწერა.

მათივე თქმით, საქართველოში წლებია პოლიტიკური პარტიები მათ მსგავსად მომზადებულ სიებს აბარებენ ცენტრალურ საარჩევნო კომისიას, რეგისტრირდებიან და მონაწილეობას იღებენ არჩევნებში.

გირჩმა არჩევნებში მონაწილეობისთვის საჭირო ხელმოწერები ცესკოში 31 ივლისს, ფაეტონითა და ხურჯინით მიიტანა.

On.ge დაუკავშირდა ცენტრალურ საარჩევნო კომისიას და მათგან ელოდება განმარტებას.