ლუქსემბურგში ევროკავშირის საგარეო საქმეთა მინისტერიალი დაიწყო, სადაც საქართველოს შესახებაც იმსჯელებენ.

საზოგადოებრივი მაუწყებლის ინფორმაციით, საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა, ჯოზეფ ბორელმა თქვა, რომ გადაწყვეტილებას დღეს არ მიიღებენ.

"ერთი რამ ცხადია, საქართველოსთვის ევროკავშირის წევრობის კარი ღიაა, მაგრამ ხელისუფლება თუ განაგრძობს იმავე გზას, განაგრძობს იმას, რასაც აკეთებს ახლა, ეს კარი დაიხურება და ქართველი ხალხი გადაიხდის საფასურს, ხალხი იზარალებს", — თქვა მან.

ბორელის განცხადებით, მინისტრებს საქართველოსთან დაკავშირებით წარუდგენს დოკუმენტს, სადაც განმარტებულია სხვადასხვა საკითხი, თუ რისი გაკეთება შეიძლება მოკლე და საშუალოვადიან პერსპექტივაში იმისთვის, რომ ქვეყანაში მიმდინარე პროცესები შეჩერდეს.

"მაგალითად, ევროპის სამშვიდობო ფონდის მეშვეობით მხარდაჭერის შეწყვეტა, ან მაღალი დონის პოლიტიკური კონტაქტების შეწყვეტა, ფინანსური მხარდაჭერის გარკვეული ნაწილის შეწყვეტის განხილვა, რომელიც პირდაპირ მთავრობას მიეწოდება. ჩვენ არ გვინდა, ზიანი მივაყენოთ მშვიდობიან მოსახლეობას. ჩვენ არ გვინდა მეტი ტკივილი მივაყენოთ ხალხს, მაგრამ არსებობს გადაწყვეტილებები და დღის ბოლოს შემეძლება გითხრათ, როგორი იყო მინისტრების რეაქცია ჩემს წინადადებებზე“, – განაცხადა ჯოზეფ ბორელმა.