გრძელი და დამღლელი კვირის შემდეგ საკუთარ თავს გამუდმებით ერთი და იმავე შეკითხვას ვუსვამთ: როგორ გავატაროთ უქმეები ისე, რომ თან დავისვენოთ და თან გავერთოთ?

ამ ბლოგში მოგიყვებით 3 საინტერესო ღონისძიების შესახებ, რომლებიც ამ შაბათ-კვირას კალენდარზე აუცილებლად უნდა მოინიშნო. ღონისძიებების მთავარი სპონსორი თიბისია.

Tbilisi Open Air 2024

თუ პარასკევი და შაბათ-კვირა მუსიკისა და ცეკვის გარეშე ვერ წარმოგიდგენია, მაშინ გირჩევ, ფერადი ტანსაცმელი ჩაიცვა და გეზი ლისის საოცრებათა ქვეყნისკენ აიღო. ივნისის ბოლო უქმეებზე, თბილისი, ტრადიციულად კავკასიის რეგიონში ყველაზე მასშტაბურ ღონისძიებას, Tbilisi Open Air-ს უმასპინძლებს.

21, 22 და 23 ივნისს ფესტივალი განსხვავებული ასაკისა და მუსიკალური გემოვნების ადამიანებს ერთ სივრცეში მოუყრის თავს და კიდევ ერთხელ გაგვახსენებს, რომ მუსიკა ათავისუფლებს.

ნორვეგიელი მუსიკოსი AURORA, ფრანგული ბენდი La Femme, ბრიტანელი რეპერი M.I.A, ინგლისური ჯგუფი Archive — ეს მხოლოდ ძალიან მცირე ჩამონათვალია იმ შემსრულებლებისა, რომელთა მოსმენასაც წლევანდელ Tbilisi Open air-ზე შეძლებ. გარდა ამისა, ფესტივალის ჰედლაინერებს შორის ისეთ ქართულ ჯგუფებსაც აღმოაჩენ, როგორებიც Mechanical Rainbow, MokuMoku, Killages, ბაჩო ჯიქიძე და ესთეტი ბიჭები არიან.

ფესტივალის ბილეთების შეძენას აქ შეძლებ.

ZEG — ამბის თხრობის საერთაშორისო ფესტივალი

ბევრი შთამაგონებელი და საინტერესო ამბავი — აი, რას უნდა ელოდო, თუ გადაწყვეტ 21, 22, 23 ივნისს ამბის თხრობის საერთაშორისო ფესტივალს, ZEG-ს ესტუმრო.

Impact Hub Tbilisi-სა და Coda Story-ს მიერ 2019 წელს დაფუძნებულ საერთაშორისო ფესტივალი ყოველწლიურად იმ ადამიანებს აერთიანებს, რომლებსაც ჩვენამდე ამბები სხვადასხვა გზით მოაქვთ — ლიტერატურით, მედიით, ტექნოლოგიებით, ფოტოგრაფიით თუ კინოთი.

წელს ZEG-ი 100-ზე მეტი უცხოელ და ადგილობრივ მომხსენებელს მასპინძლობს, მათ შორის არიან: მარია რესა, ნობელიის პრემიის ლაურეატი მშვიდობის დარგში, გარი შტეინგარტი, The New York Times-ის ბესტსელერის ავტორი, ჯო საბია — Vogue-ის საკულტო 73 Questions-ის შემქმნელი და მრავალი სხვა წამყვანი პროფესიონალი მსოფლიოს სხვადასხვა წერტილიდან.

ფესტივალზე დიდი ყურადღება დაეთმობა საქართველოში მიმდინარე მოვლენებს, ამიტომ თუ დაუვიწყარი ამბების მოსასმენად მზად ხარ, უკვე იცი, უქმეებზე სადაც უნდა წახვიდე.

ბილეთების შეძენას ამ ბმულზე შეძლებ.

კოკა რამიშვილის გამოფენა "პლატფორმა მოვლენისთვის"

თუ უქმეების მშვიდად გატარება გინდა და თან ხელოვნებაც გიყვარს, შეგიძლია თიბისი კონცეპტის მულტიფუნქციურ სივრცეს ესტუმრო. სწორედ აქ დაგხვდება უახლესი ქართული მხატვრობის ისტორიის ერთ-ერთი ყველაზე საინტერესო შემოქმედის, კოკა რამიშვილის გამოფენა “პლატფორმა მოვლენისთვის“.

მხატვრის ახალი ნამუშევარი მულტიმედიური ინსტალაციაა, რომელიც თვითონ ჰყვება თავისივე შექმნის ისტორიას. პროექტის ხმოვან ნაწილზე კომპოზიტორმა ნიკა მაჩაიძემ იმუშავა.

გამოფენის სანახავად 13 ივლისის ჩათვლით მარჯანიშვილის 7-ს უნდა ეწვიო.