Apple TV+-ზე მალე ახალი საი-ფაი თრილერი გამოჩნდება. ბნელი მატერია ამერიკელი მწერლის, ბლეიკ კრაუჩის, ამავე სახელწოდების ბესტსელერი რომანის ეკრანიზაციაა, რომელიც ჯამში 9 სერიას მოიცავს. სერიალის პრემიერა მაისში შედგება, მანამდე კი უკვე გვაქვს შესაძლებლობა, პირველ კადრებს შევავლოთ თვალი.

ფოტო: Apple TV+

ბნელ მატერიაში სიუჟეტი ჩიკაგოს ერთ-ერთი კოლეჯის კვანტური მექანიკის პროფესორის, ჯეისონ დესენის, გარშემო ვითარდება. დესენს წარსულში ბრწყინვალე სამეცნიერო კარიერის შექმნის შესაძლებლობა ჰქონდა, მაგრამ მან არჩევანი ოჯახზე, ცოლსა და შვილზე, გააკეთა. ერთ დღესაც, პროფესორს შენიღბული უცნობი იტაცებს, ჯეისონი კი სხვა რეალობაში იღვიძებს, სადაც არც დაქორწინებულია და არც შვილი ჰყავს. სამაგიეროდ, ამ პარალელურ სამყაროში იგი წარმატებული ფიზიკოსია.

ფოტო: Apple TV+

წიგნშიც და ფილმშიც ამბავი ეფუძნება მრავალი სამყაროს არსებობის თეორიას — კვანტური მექანიკის ერთგვარ ინტერპრეტაციას, რომლის მიხედვითაც ჩვენ მიერ მიღებული ყოველი გადაწყვეტილების შედეგი პარალელურ რეალობას ქმნის.

ფოტო: Apple TV+

ბნელი მატერიის პირველ ორ სერიას 8 მაისს ვიხილავთ, მომდევნო ეპიზოდები კი ოთხშაბათობით გამოვა ხოლმე.

///

აღსანიშნავია, რომ სერიალის რამდენიმე ეპიზოდის სცენარის ავტორი თავად კრაუჩია, პირველი სერიების რეჟისორი კი იაკობ ვერბრიუგენი გახლავთ. ეკრანიზაციაში მთავარ როლს ჯოელ ეჯერტონი ასრულებს.

ბევრ სხვა ენასთან ერთად, ბლეიკ კრაუჩის ბნელი მატერია ქართულადაცაა ნათარგმნი. რომანი სულაკაურის გამომცემლობამ დაბეჭდა 2018 წელს (მთარგმნელი ალექსი სიუკაევია). თბილისის საერთაშორისო ლიტერატურული ფესტივალის ფარგლებში, მწერალი საქართველოშიც იმყოფებოდა 2021 წელს.