მოკლედ: პირველმა არხმა დახურა გორგილაძის აუტანელი სიმსუბუქე. გადაცემა ახალი წლიდან ეთერში აღარ გავა. ამის შესახებ On.ge-ს გადაცემის პროდიუსერმა, ნატა მაღალაშვილმა დაუდასტურა.

  • "არხზე რამდენიმე გადაცემა იხურება და, მათ შორის, ჩვენც", — გვითხრა პროდიუსერმა — "როგორც გვითხრეს, ფინანსური პრობლემები შეიქმნა და მიმდინარეობს რეორგანიზაცია."
  • პროდიუსერმა, დამატებითი დეტალების შესახებ, არ იცის.
  • On.ge შეეცადა, დეტალები დაეზუსტებინა საზოგადოებრივი მაუწყებლის გენერალურ დირექტორთან, თინათინ ბერძენიშვილთან, და ასევე, რუსუდან მანჯგალაძესთან — მაუწყებლის მედიის დირექტორთან. მათ ზარებს არ უპასუხეს.

გადაცემის დახურვის შესახებ, ინფორმაცია წინასწარ არ ყოფილა ცნობილი არც საზოგადოებრივი მაუწყებლის სამეურვეო საბჭოსთვის, გვითხრა ბორდის წევრმა, ლიკა ბასილაია-შავგულიძემ.

"ძალიან გაოგნებული და გაბრაზებული ვარ, დაიხურა ერთ-ერთი გადაცემა, რომელიც ქმნიდა არხის პოზიტიურ იმიჯს; არაჩვეულებრივი პროექტი, რომელიც საზოგადოებრივ მაუწყებელს დადებითი კუთხით უთქვამდა სახელს. მიზეზი არ ვიცი, ვარკვევთ ჩვენც [სამეურვეო საბჭო] ახლა დეტალებს", — გვითხრა მან.

ბასილაია-შავგულიძის თქმით, არხზე გადაცემების დახურვის თაობაზე არაფერი უთქვამს ტელევიზიის გენერალურ დირექტორს, თინათინ ბერძენიშვილს, რომელიც სამეურვეო საბჭოს გუშინდელ სხდომას ესწრებოდა.

  • მაყურებელი გადაცემის ბოლო ეპიზოდს ნახავს 29 დეკემბერს — უთხრა დავით გორგილაძემ რადიო თავისუფლებას .
  • ასევე, ისიც, რომ აღარ იქნება ტელევიზიის თანამშრომელი, რადგან მისთვის მაუწყებელს თანამშრომლობის გაგრძელება არ შეუთავაზებია.