ისრაელის თავდაცვის ძალების წარმომადგენელმა, დანიელ ჰაგარიმ პრესკონფერენციაზე დაადასტურა, რომ ღაზაში, ჯაბალიას ლტოლვილთა თავშესაფარზე შეტევა ისრაელმა მიიტანა.

  • ჰაგარის თქმით, დარტყმის შედეგად მოკლულია ჰამასის ერთ-ერთი ლიდერი იბრაჰიმ ბიარი და ასევე, დაანგრიეს ჰამასის მიწისქვეშა ინფრასტრუქტურა.
  • ბიარისთან ერთად, მოკლულია დაჯგუფების კიდევ რამდენიმე წევრი.
  • თავდაცვის ძალების წარმომადგენელმა კვლავ მოუწოდა მოსახლეობას, ღაზის სექტორის სამხრეთით გადაინაცვლონ.
  • ის ამბობს, რომ ჰამასის ლიდერი, სინვარი, მოსახლეობაზე არ ფიქრობს და მიწისქვეშა ინფრასტრუქტურა განგებ ააშენა ქალაქში, საცხოვრებელი სახლების ქვეშ.

რა მოხდა გუშინ ღამით ღაზაში: ჯაბალიას ბანაკის ტერიტორიაზე ძლიერი აფეთქების შედეგად დაინგრა საცხოვრებელი სახლები.

  • წინასწარი მონაცემებით, ისრაელის დარტყმას, სულ მცირე, 50 ადამიანი ემსხვერპლა.

მეტი ინფორმაცია ჯაბალიაზე: ის არის ღაზის 8 ლტოლვილთა ბანაკებს შორის ყველაზე დიდი.

  • 2023 წლის ივნისისთვის, გაეროს მონაცემებით, ბანაკში 116 ათასზე მეტი პალესტინელი იყო დარეგისტრირებული.
  • ლტოლვილებმა ბანაკის აშენება 1948 წლის ომის შემდეგ დაიწყეს. ეს არის პატარა, 1.4 კვადრატული კმ-ს მოცულობის, თუმცა მჭიდროდ დასახლებული ტერიტორია.
  • ჯაბალიაში 26 სკოლაა, 16 შენობაში. აქვე არის საკვების სადისტრიბუციო ცენტრი, 2 სამედიცინო ცენტრი, ბიბლიოთეკა და წყლის რამდენიმე ჭა.
  • შათის ბანაკთან ერთად, ჯაბალიაც იმ ტერიტორიაზე მდებარეობს, რომელიც ისრაელმა ევაკუაციის ზონად გამოაცხადა.