თბილისში, გუდიაშვილის მოედანის მიმდებარე ტერიტორიაზე გზის შესაკეთებელი სამუშაოები დაიწყო. ამ მოედანზე თბილისის საკრებულოს დამოუკიდებელი დეპუტატი, ალეკო ელისაშვილი საინიციატივო ჯგუფმა თბილისის მერობის კანდიდატად სამშაბათს, 11 ივლისს უნდა წარადგინონ.

ალეკო ელისაშვილმა On.ge-ს უთხრა, რომ სამუშაოები გუშინ, 7 ივლისს დაიწყო. მისი თქმით, ეს ადგილი დაახლოებით წელიწადნახევარია გადათხრილია და ვარაუდობს, რომ მერიამ მას შემდეგ დაიწყო მის შეკეთებაზე ფიქრი, რაც მისი მერობის კანდიდატად წარდგენა ამ ადგილიდან გადაწყდა. სამუშაოების მიმდინარეობის მიუხედავად, ის ამბობს, რომ მას მაინც ამ მოედნიდან წარადგენენ.

"მაგისთვის არის [ეს სამუშაოები] ძალიან, რომ არ დაგვეცინა მერიისთვის, როგორი მიგდებული იყო [გუდიაშვილის მოედანი]. როგორც ჩანს რაღაცის მოწესრიგება უნდათ. რაც გავრცელდა, რომ სამშაბათს საღამოს იქნება [მერად წარდგენის] პრეზენტაცია, როგორც ჩანს მიიღეს გადაწყვეტილება, რომ თავი არ მოსჭროდათ და ძალიან არ გაბანძებულიყვნენ," - ამბობს ელისაშვილი თბილისი მერიაზე და დასძენს, რომ მან გზის შეკეთებაზე დასაქმებული ადამიანებისგან შეიტყო, რომ სამუშაოების დასრულება სამშაბათამდე იგეგმება.

On.ge-ს სურდა თბილისის მერიისგან ან ამავე უწყების კეთილმოწყობის სამსახურისგან მიეღო პასუხი რატომ დაიწყო ახლა გზის შეკეთების სამუშაოები. თუმცა, უწყების პრესსამსახურში სატელეფონო ზარებს არ უპასუხეს.