19 წლის ქართველმა მომღერალმა, ლიზი გოზალიშვილმა, The Voice of Germany-ის ბრმა კასტინგი წარმატებით გადალახა და 2023 წლის კონკურსის მონაწილე გახდა. ლიზი გოზალიშვილმა მაიკლ ჯექსონის სიმღერა Earth Song შეასრულა და ჟიურის დიდი მოწონებაც დაიმსახურა.

"სცენაზე გასვლამდე ალბათ ყველაფერს წარმოვიდგენდი, მაგრამ ატირებულ მწვრთნელს და სპონტანურ დუეტს — ნამდვილად ვერ", — წერს ლიზი გოზალიშვილი ფეისბუქზე და ბრმა კასტინგის ვიდეოსაც აქვეყნებს.

წლევანდელ გერმანული Voice-ის ერთ-ერთი ჟიური ცნობილი მომღერალი ჯოვანი ზარელაა, რომელიც ბრმა კასტინგზე ლიზის თავიდანვე შემოუტრიალდა, შემდეგ კი მასთან სპონტანური დუეტიც შეასრულა. ჟიურიში ასევე არიან ცნობილი გერმანული ჯგუფის, Tokio Hotel-ის, წევრი ძმები — ტომ და ბილი კაულიცები, რომლებსაც ლიზის შესრულება ძალიან მოეწონათ და შემოუტრიალდნენ კიდეც. ბოლოს კი ლიზიმ გადაწყვიტა, რომ ჟიურის წევრებიდან ჯოვანი აერჩია.

ჟიურის წევრებმა ლიზის ჰკითხეს, თუ რატომ შეარჩია მაიკლ ჯექსონის ეს ცნობილი სიმღერა. "სიმღერა ისეთ თემას ეხება, რაც ძალიან აქტუალურია. მსოფლიოში დღეს ისევ ომია. მე საქართველოდან ვარ და ჩემმა ქვეყანამაც არაერთხელ გადაიტანა ომი. ჩემთვის ძალიან მნიშვნელოვანი იყო, რომ ამ სიმღერით მეთქვა ის, რასაც ვფიქრობ", — უპასუხა ლიზიმ.

ლიზი გოზალიშვილმა ქართულ Voice-შიც მიიღო მონაწილეობა, ახლა კი ის გერმანიაში ცხოვრობს და სწავლობს. რაც შეეხება გერმანულ Voice-ს, ახალი სეზონის ჩვენება 21 სექტემბერს დაიწყო და წლევანდელი სეზონი 6 ივნისამდე გაგრძელდება.